Trés conceyos aprueben mociones de sofitu a la manifestación pola oficialidá del 21-A

Los Plenos de Ḷḷena, Noreña y Carreño aprobaron mociones de sofitu a la manifestación ‘L’asturianu llingua oficial ¡agora!’ del día 21 qu’entama n’Uviéu la Xunta pola Defensa de la Llingua Asturiana (XDLA). La organización nun apara de recibir apoyos de coleutivos y sindicatos, como USO y la yá anunciada de CC OO.

Son doce los conceyos que vienen aprobando mociones de sofitu a la oficialidá nes que s’encamienta a los grupos políticos de la Xunta Xeneral a entamar el procesu de reforma del Estatutu qu’incluya la equiparación de derechos de los falantes d’asturianu colos de castellanu: Mieres, Xixón, Uviéu, Avilés, Noreña, Ḷḷena, Castrillón, Llaviana, Villaviciosa, Grau y Corvera, amás de Bimenes, qu’oficializó la llingua asturiana nel 2016. Dos d’ellos, Ḷḷena y Noreña, tán acabantes de dar tamién el preste a mociones nes que sofiten la convocatoria de la XDLA del día 21, al igual que Carreño.

Esti coleutivu sigue trabayando pa esparder la manifestación y ampliar los apoyos a la mesma cola fin de convertila nuna demostración del enfotu de la sociedá asturiana na defensa de la llingua asturiana y el gallego-asturiano. Amás de poner en marcha campañes de difusión, la presentación de cantares pa promocionar la convocatoria y una importante campaña publicitaria na radio y n’autobuses urbanos, ta celebrandro conceyos con asociaciones, entidaes y sindicatos.

Tres l’apoyu públicu amosáu la selmana pasada por Comisiones Obreres (CC OO), col so secretariu xeneral, José Manuel Zapico, a la cabeza, la Unión Sindical Obrera (USO) tamién fixo lo propio darréu. Asina, Begoña Díaz-Penedo, secretaria d’Organización del sindicatu, y Miguel Rivero García, secretariu d’Emplegu y Sindicalización fotografiáronse con un cartelu de la convocatoria.

La manifestación pola oficialidá del asturianu y gallego-asturianu va celebrase’l día 21 n’Uviéu, con salida a les 12 hores de la Estación del Norte (RENFE).

Participación nunes xornaes n’Aragón

La XDLA, representada por Xulián Suárez, participa como convidada esta tarde na conferencia que va abrir les XXV Chornadas d’as Lenguas d’Aragón qu’entama en Zaragoza l’Asociación Cultural Nogara Religada y que van allargase hasta el día 19 con ponencies, conciertos, recitales o esposiciones. ‘Lo camín de l’asturiano enta la oficialitat’ ye’l nome de la charra que va comenzar a les 19 hores nel Centro Joaquín Roncal.

Na semeya, Rivero García y Díaz-Penedo.