Trenta delegaos sindicales pasen la nueche na sede del Sespa

Los sindicatos sanitarios decidieron entamar un zarru na sede del Serviciu de Salú del Principáu d’Asturies (Sespa). Alredor de trenta delegaos sindicales ocuparon les dependencies na mañana del miércoles y pasen la nueche nel llugar.
 
USAE, Satse, Sicepa, CC OO y UXT son los sindicatos qu’entamen esta aición como protesta énte l’aprobación, por parte del Conseyu de Gobiernu, del 'Alcuerdu pol que se regula la xornada ordinaria nel ámbitu de los centros y instituciones sanitaries del serviciu de salú del Principáu d’Asturies'. Nun tán d’alcuerdu y piden "diálogu".
 
A lo llargo del día, representantes de la conseyería, incluyíos dos direutores xenerales y el xefe de Gabinete, aconceyaron colos sindicalistes y comprometiéronse a lleer otra vuelta les propuestes de los sindicatos. Anque nun prometieron nada, quedaron en dar una respuesta esta mañana, polo que los sindicatos decidieron que nun van salir del edificiu al menos hasta escuchar esa respuesta. Ven abusiva la’aplicación de la xornada tal y cómo ta plantegándolo’l Gobiernu, consideren xustes les sos reivindicaciones y aseguren que tienen la moral "mui alta".
 
Crítiques del Gobiernu a la política sanitaria del PP
 
El mesmu día que los sindicalistes entamaben el zarru, la Conseyería de Sanidá d’Asturies, xunto cola d’Andalucía, Canarias y Euskadi, manifestó’l so refugu a les polítiques "regresives" que na materia ta desenvolviendo'l Gobiernu del PP y pidió al ministeriu qu'impulse'l diálogu social y institucional con toles autonomíes, partíos políticos y axentes sociales y que "respete’l papel y ámbitu de decisión de les autonomíes".
 
Esta declaración conxunta fíxose depués de que la ministra de Sanidá, Servicios Sociales y Igualdá, Ana Mato, convocara a los conseyeros autonómicos de Sanidá a una xunta "informal" en Valladolid coles mires d'evaluar l'impautu de les midíes de la reforma sanitaria que yá se punxeron en marcha.