Tramítase'l decretu que va dexar aplicar el copagu a residentes del ERA dependientes enantes del añu 2011

Servicios y Derechos Sociales yá empezó la tramitación alministrativa del decretu que va facer posible l’aplicación del copagu a tolos residentes del ERA declaraos dependientes enantes del 2011. L’actuación afecta a 2. 338 espedientes que nun se beneficiaron del réxime económicu de la Llei de la Dependencia.

El procedimientu de consulta previa, que yá empezó, va tar operativu nel Portal de Tresparencia hasta'l 16 de marzu. El procesu va incluyir tamién un periodu d'información pública pa la recepción d'alegaciones y, en cuntando con tolos informes técnicos y xurídicos necesarios, va unviase al Conseyu Consultivu pa qu'emita’l so dictame.

La conseyera Pilar Varela compareció ayeri a pidimientu propiu na Xunta Xeneral pa informar sobre'l testu llegal nuevu, que va dexar resolver les desigualdaes xeneraes nes lliquidaciones de servicios de determinaos residentes del organismu Establecimientos Residenciales pa Persones Mayores (ERA poles sos sigles en castellanu) que nun se beneficiaron del copago previstu na llei de la dependencia.

Dos causes

Esta situación pudo producise por dos causes. Una, porque'l decretu autonómicu 144/2010, que regula los precios públicos de servicios especializaos de la dependencia y qu’entró en vigor el 1 de xineru del 2011, nun foi aplicable a les persones declaraes dependientes dende la entrada en vigor de la llei'l 1 de xineru del 2007, al nun tener el decretu calter retroactivu. La otra, porque l'Alministración o los mesmos usuarios optaron por siguir pagando conforme al preciu públicu establecíu, al considerar que se trataba de la opción más ventaxosa.

Varela esplicó que, d’alcuerdu cola auditoría interna que fixo la so conseyería nos últimos meses, el decretu va afectar a 2.338 espedientes de lliquidación de servicios de persones finaes, concretamente 1.287 que morrieron ente’l 2007 y avientu del 2010 y a les que nun se pudo aplicar el copagu porque'l decretu nun tenía calter retroactivu; y 1.051 que finaron a partir del 2011 ensin pasar a la modalidá de participación nel costu del serviciu prevista na llei de la dependencia.

La titular de Servicios Sociales señaló que cola tramitación del decretu'l Gobiernu avanza nel cumplimientu de la moción aprobada pol Parllamentu –convertida en llei en payares del 2016– onde se pidía al Executivu que revisare lliquidaciones del ERA y qu’impulsare una auditoría sobre les deudes reclamaes polos usuarios.