Tráficu va controlar la velocidá en carreteres secundaries

El director xeneral de Tráficu, Pere Navarro, declaróse ayeri esmolecíu pol númberu d'accidentes de tráficu que se rexistren, y aseguró que, acordies coles sos cuentes, si se respetaren los topes de velocidá llegales habría mil muertos menos al añu, en cuantes que l'escesu de velocidá alcuéntrase tres d'ún de cada cuatro accidentes. L'incrementu d'un 27% de los muertos en moto no que va d'añu tamién llamó l'atención de Navarro, que pidió prudencia a los motoristes recordando que 54 de les 269 persones que morrieron esti añu n'España n'accidentes diben en moto.

Navarro, que presentó la campaña especial de control de velocidá de la DXT, recordó que'l próximu mes de payares va entamar un plan de seguridá integral pa motoristes, pero qu'hasta entós nun van quedar paraos.

"Tamos esmolecíos y facemos una llamada especial a estos conductores pa qu'estremen la prudencia", dixo. Trátase, nun 70 por cientu de los casos, d'accidentes ocurríos demientres el fin de selamana, el sábadu pela tarde o'l domingu pela mañana, con una edá media de los muertos de 35 años. Amás, trátase de motos de gran cilindrada y con menos de tres años d'antigüedá. El 85 por cientu de los accidentes produxéronse en carreteres secundaries y dos de cada cinco fueron por salíes de vía. "Pensamos que s'une la falta d'esperiencia cola sensación de potencia, lo que xenera un gran peligru", recalcó.

Per otru llau, esplicó que la DXT va controlar 100.000 vehículos diarios en carreteres secundaries de doble sentíu dende güei, llunes seis d'agostu, hasta'l 19 del mesmu mes, dientro de la so campaña especial de vixilancia de la velocidá.

Asina, los axentes de l'Agrupación de Tráficu de la Guardia Civil van duplicar los controles sobre esti factor de peligru, estableciendo servicios de vixilancia de casi 2.000 tramos de carreteres colos 250 radares móviles de que dispón, a lo llargo de toles comunidaes autónomes, menos País Vascu y Cataluña que tienen les competencies tresferíes. En total, prevése controla polo menos un 1.500.000 vehículos.

Esta operación especial va acompañada de la correspondiente campaña de concienciación, baxo l'eslogan 'Hai abondes razones pa respetar les llendes de velocidá. Escueye la tuya y failo'. Asina, en televisión van emitise anuncios de 20 y 10 segundos en toles cadenes d'ámbitu nacional, y la emisión de cuñes de radiu de 30 segundos que van emitise nes estremaes cadenes.