Trabe repite'l so concursu d'Antroxu con 'La naranxa mecánica'

Los meyores disfraces de drogos van recibir nesta ocasión una bolsa con una esbilla de pallabreru nadsat de la torna al asturianu.

Per segundu añu Ediciones Trabe quier animar l'Antroxu con un concursu al rodiu 'La naranxa mecánica', segunda obra de la coleición 'Calume' que traduxo José Luis Piquero al nuesu idioma. La mecánica va ser la mesma, con trés premios pa los mazcaritos que convenzan al xuráu.

Les persones que quieran participar han antroxar de drogu (o droga), los personaxes de la novela d'Anthony Burgess popularizaos pola película homónima de Stanley Kubrick, y xubir la semeya mientres estos díes de celebración en redes sociales etiquetando a Trabe o la cuenta de Calume n'Instagram xunto colos 'hastags' #antroxu2022 y #nadsat. Les trés meyores van recibir una bolsa con un llamativu diseñu obra de Samuel Castro y fabricada por Güeso nel qu'apaecen pallabres como 'gullivera', 'molloca', 'debocha' o 'xorroso'.