Trabe edita n’asturianu “Les cien llaves” del aragonés Chuse Raul Usón

L'aragonés Chusé Raúl Usón (Zaragoza, 1966) ye ún de los escritores qu'empleguen la minoritaria llingua aragonesa pa les sos obres. Director de la prestixosa editorial Xordica, tien publicada una riestra d'obres poétiques, con títulos como Dezinueu repuis d'una bida dallata (1986) Ixe buxo biello -entre fierros- (1988) Luna, arto y poemas de bardo (1989) Fuellas chobenas (1991) y tamién dellos rellatos en prosa como Nueis d'agüerro (1986) Trista boira baxa (1994) y Benzina (2003). "Les cien llaves" nel orixinal aragonés "As zien claus" ye la primer obra d'esti autor y la primera n'aragonés que se traduz al asturianu, ello de la mano d'Héctor Xil, un lleonés comprometíu cola llingua de la tierra.

La carta de presentación de "Les cien llaves" fala de la prosa poética de Chusé Raul Usón como una lliteratura "Desnuda y tienra" ambientada nun reformatoriu de menores onde'l narrador, qu'emplega la primer persona pa dar la visión d'esa cruel realidá, trabaya con un contratu temporal. Con esti orixinal y frescu dietariu algamó Usón el Premiu Arnal Cavero del Gobiernu d'Aragón na convocatoria de 1995.

La presentación de la obra va tener llugar el xueves 29 d'avientu de 2005, a les 8 la tarde, na Aula Abierta de la Llibrería Asturiana Trabe nel númberu 4 de la Cai Padre Buenaventura d'Uviéu. La presentación va facela l'escritor Xuan Bello, y a ella van asistir l'autor Chusé Raúl Usón y el traductor Héctor Xil.