Trabe asoleya’l poemariu ‘Esti llugar qu’agora ye nuesu’ d’Aida Escudero

El poemariu ganador del XXIV Premiu de Poesía en Llingua Asturiana Fernán Coronas, correspondiente al añu 2017, yá ta a disposición de tolos llectores. Ediciones Trabe ta acabante d’asoleyar ‘Esti llugar qu’agora ye nuesu. Poesía neanderthal’ d’Aida Fernández Escudero, autora que presenta esti llibru n'Uviéu.

La obra que mereció’l gallardón qu’entrega la Sociedad Popular, Recreativa y Cultural La Regalina, de Cadavéu, y que lleva de nome l’alcuñu del Padre Galo n’homenaxe al escritor valdesanu ta conformada por 27 poemes que destaquen pola so temática novedosa. Escudero fai nellos una reflexón póetica sobre “los principales ‘argumentos’ de la vida: l’amor, el pasu del tiempu, la perda…, ensin desdexar problemátiques sociales como la situación de la muyer, la rellación del ser humanu col mediu en que vive, la solidaridá…” al traviés de la dómina y los seres neanderthales.

Estos asuntos trátalos “d’una forma bien curiosa y con un asturianu pulcru y urbanu”, añaden dende la editorial. ‘Esti llugar qu’agora ye nuesu. Poesía neanderthal’ ye’l segundu llibru de la filóloga y maestra de Llingua Asturiana en Secundaria nacida nel 1985 n’Uviéu tres ‘Familia con autorretratu al fondu’ (Impronta, 2018), Premiu Asturias Xoven de Poesía 2017, anque tien espublizada obra en revistes lliteraries como ‘Formientu’ o ‘Lliteratura’.

Escudero va presentar esta tarde la so poesía neanderthal na Llibrería Trabe nun actu que va comenzar a les 20 hores. Con ella van tar la escritoria Marta Mori y la editora Esther Prieto.