Trés novedaes lleguen esta selmana a les llibreríes asturianes

Suburbia Ediciones y Publicaciones Ámbitu tán acabantes d’asoleyar delles espublizaciones. La editorial xixonesa presenta una escoyeta de testos del asturlleonés occidental y la uviedina dos obres de la so coleición de narrativa.
 
‘Onde la pallabra pousa. D’Asturias a Miranda: Crestomatía del asturḷḷionés occidental’ ye un trabayu de Xulio Viejo y María Cueto onde recueyen testos del asturlleonés occidental escritos dende la Edá Media hasta los nuesos díes. Asina, los llectores van poder atopar poesía, narrativa, teatru y ensayu que lleven la firma d’autores tan reconocíos como’l Padre Galo, António Maria Mourinho, Xuan Bello, Miguel Rojo, Ramón d'Andrés o Roberto González-Quevedo, ente otros. El llibru tamién recueye traducciones d’autores como Anacreonte, Perrault, Brassens, Luis de Camoes o Goethe. “‘Onde la pallabra pousa’ ye una ferramienta imprescindible pal estudiu de la llingua asturiana a la par qu'un llibru de desfrute que mos permite acceder a los meyores testos escritos en asturḷḷionés occidental”, señalen dende Suburbia Ediciones.
 
Les otres dos novedaes que lleguen a les llibreríes asturianes son dos obres de narrativa editaes por Publicaciones Ámbitu y escrites por Cristina Muñiz y Roberto González-Quevedo. L’autora xixonesa presenta ‘Cosa de tiempu’, un llibru qu’axunta quince rellatos protagonizaos por héroes anónimos “que llevanten la bandera del inconformismu énte un destín –non deseáu– ordenáu por otros”. Trátense d’homes y muyeres comunes que “entamen una llucha, individual o coleutiva, por salvase, por salvar a la pareya, por sobrevivir a la crisis o por vencer a la inxusticia o la decepción”.
 
Pela so parte, González-Quevedo espubliza ‘Sangre na braña’, una novela policiaca, xéneru poco cultiváu en llingua asturiana. La trama entama col asesinatu d’una familia na so cabaña asitiada nuna braña de la zona del Altu Sil. Nun s’alcuentren testigos y el misteriu paez anubrir el casu, anque una pista que lleva hasta Bélxica paez que pue servir pa dar col culpable.
 
Presentación de ‘Los nomes de la lluvia’
 
Esti vienres va tener llugar la presentación de ‘Los nomes de la lluvia’, poemariu d’Ana Rosa Fernández asoleyáu recién por Suburbia Ediciones dientro de la coleición ‘Males tierres’. L’autora va presentar esta obra en casa, en Sotrondio, nun actu nel que tamién van intervenir la conceyala de Cultura de Samartín del Rei Aurelio, Gema Suárez, y Ana Jambrina Huete, Silvia Cosio y Xulio Arbésu. La cita, organizada pola Asociación Cauce del Nalón y por Suburbia, ye a les 20 hores na Casa d’Alcuentros de la Muyer (avenía de San Frechoso, 17).