Tráxicu accidente en L.lena

Cuatro muertos y 29 firíos foi'l balance d'un accidente que punxo'l piesllu tráxicu a la selmana santa n'Asturies. L'accidente tuvo llugar ayeri domingu a les siete menos cuarto de la tarde cuando un autocar que llevaba a un grupu de scouts que volvíen d'un campamentu en La Vecilla (Lleón), volcó n'autovía que conecta Asturies cola meseta por causes qu'entovía nun se conocen. El coche entornó y arrastróse dellos metros hasta que lu frenó la barrera de l'autovía.

Cuatro pasaxeros morrieron, dos d'ellos neños que veníen del campamentu y otros dos muyeres adultess, una d'elles monitora del mesmu campamentu, mientres qu'otros 29 pasaxeros de los 37 que llevaba l'autocar tuvieron de ser ingresaos nos hospitales de la redolada, dellos con mancadures d'estrema gravedá, treslladándose dempués a los firíos de más gravedá al Hospital Central d'Asturies n'Uviéu. El conceyu de L.lena, onde ocurrió l'accidente, y el de Xixón, llugar d'au yera l'agrupación de scouts, declararon dos díes oficiales de llutu, mientres que se cuenta con que pa esta tarde los familiares de les víctimes y l'agrupación de scouts de Xixón faigan un comunicáu públicu. Según datos oficiales, l'autocar circulaba a velocidá normal y el conductor dio negativo nes prebes d'alcoholemia.

Les víctimes del accidente pertenecíen al movimientu scout d'Asturies, una de les organizaciones d'asociacionismu mozu más actives y tamién de les más comprometíes cola recuperación de la llingua asturiana, siendo'l so nome oficial n'Asturianu y emplegando esta llingua davezu nes sos presentaciones y actividaes.