TPA emite en prebes pela so segunda canal los Plenos de la Xunta Xeneral

La segunda canal de TPA, qu’apaez col nome de ‘A8’ nos televisores, principió esti xueves a retresmitir en prebes los Plenos de la Xunta Xeneral. El vienres, a les 9 hores, va continuar cola emisión en direuto de los debates.

Según informó l’ente públicu de comunicación, toles emisiones van ser accesibles, amás, en llingua de signos. Nesta primera fase de prebes la emisión nun va tar personalizada y la canal va servise de la señal qu’ufre’l Parllamentu per llinia interna y qu’emite al traviés de la so páxina web.

La intención de la cadena, en coordinación colos cinco grupos parllamentarios y la presidencia de la Xunta Xeneral, ye ufrir nun futuru próximu les comisiones y ruedes de prensa que tengan llugar na sede parllamentaria de la uviedina cai Fruela. De momento, emitirá les sesiones ordinaries de los xueves pela tarde y los vienres pela mañana.