Torre reclama al Gobiernu estatal qu’encamiente a General Dynamics a paralizar l’ERE na fábrica de Trubia

El conseyeru Graciano Torre aconceyó esti martes colos sindicatos pa tratar la situación na que queda la fábrica de Trubia col ERE previstu por General Dynamics. Reclama al Gobiernu estatal qu’encamiente a la empresa a retiralu.

El titular d’Economía y Emplegu comprometióse tres la reunión d’esta mañana con representantes de MCA-UXT, la Federación de Industria de CC OO y del comité de empresa de Santa Bárbara Sistemas de Trubia a comunicase per escritu col Executivu estatal pa reclamar qu’encamiente a la empresa, filial de la multinacional General Dynamics, la retirada del ERE d’estinción pa toles factoríes del Estáu que dexaría na cai a 289 persones na fábrica d’armes asturiana, dalgo que sería fatal pal futuru d’esta población uviedina. Torre tamién treslladará esti mensaxe al secretariu d’Estáu de Defensa, Pedro Argüelles Salaverria, y al secretariu xeneral d’Industria y de la Pequeña y Mediana Empresa, Luis Valero Artola. “El Gobiernu, que privatizó la empresa, tien tovía cauteles y capacidaes determinaes pa encamentar a Santa Bárbara a retirar l’ERE y a aniciar otres midíes colos representantes de los trabayadores”, señaló.

D'igual forma, reclama a dambos ministerios qu’esixan a General Dynamics que caltenga’l compromisu alquiríu cuando compró la planta no referente a les cargues de trabayu, contratos nuevos y inversiones teunolóxiques. “Ha de mantener el contratu del programa Pizarro pa la totalidá de los vehículos previstos, 178, dalgo que permitirá a la empresa sostener el volume de carga de trabayu nos años próximos, evitando l’ERE d’estinción”, añadió Torre, que tamién solicitará la puesta en marcha d’otros programes posibles que traigan llabor a la empresa de Trubia. Por último, aseguró que se pondrá en contautu col conseyeru delegado de General Dynamics, Carlos Villar, p’amosar la postura contraria del Gobiernu del país cola decisión tomada pola empresa. Hai que recordar qu’hai trés meses y mediu la multinacional zarró la planta de La Vega en contra de la opinión de los trabayadores cola intención d’abaratar los costos de producción.