Tornen les visites guiaes n'asturianu al Muséu Arqueolóxicu d'Asturies

Va celebrase una al mes d'avientu a xunu.

Tres la bona esperiencia entamada hai un añu, la Conseyería d'Educación y Cultura y el Muséu Arqueolóxicu d'Asturies van retomar les visites guiaes n'asturianu a la instalación. Fernando Padilla, direutor xeneral de Planificación Llingüística, apunta qu’esta aición englóbase nes midíes que dende'l Gobiernu se vien faciendo pa promover l’usu de la llingua asturiana en tolos ámbitos y que con ella búscase “averar a la población asturiana’l mundu del Arte y la Historia de la so tierra emplegando la llingua tradicional”.

Tanto'l públicu en xeneral como escolines y escolinos pueden beneficiase d'esta iniciativa de baldre. La primer actividá va desendolcase'l llunes y martes, pa colexos, y el sábadu 23 n'horariu matinal, pa tola población. Darréu, tolos meses mientres el primer semestre del 2018, va entamase una visita nueva con un itinerariu diferente.

La xente interesao en participar nesta actividá ha d'acutar plaza nel númberu de teléfonu 985.10.67.41 o nel corréu electrónicu splnormalización@asturias.org.