"Tornallás", el frutu d'un trabayu

La Banda de gaites Llacín presentó un discu que ye una perbona aportación a esti tipu de discos poles novedaes que tien.Les novedaes tan principalmente en considerar a la banda l'elementu principal del discu, pero non l'únicu. Presta ver como más de trenta gaites y la percusión de la mesma empastien con guitarres, bouzoukis, vigulinos, curdiones...etc. Y consigue empastar sacando un cd que paez por momentos el d'un grupu folk al usu, equí ye onde se nota muncho la mano del productor, Rubén Bada, y de los téunicos de soníu Sergio Rodríguez, Rubén Bada y Tana. Arranques de pieces en bloque les gaites, percusión y l'acompañamientu de la cuerda, arreglos subiendo y baxando la intensidá de les pieces, y finales ensin codes típiques de banda de gaites faen qu'esti trabayu se salga del patrón habitual d'esti tipu de discos.Nel discu collaboraron xente como Lisardo Prieto, Xosé Ambás, Elías García, Xuan Nel Expósito, Igor Medio, Marcos Llope...etc. Pero la protagonista sigue siendo la banda de gaites, una banda que naz nel añu 1998 en Llanes, y fórmase colos alumnos de la Escuela de Música Tradicional de Llanes. Esta escuela ye un de los meyores exemplos pa demostrar como les escueles son depués el meyor sofitu pa otres que van surdiendo con bandes de gaites, grupos folk o bandines tradicionales. Dende equí convidámoste a que merques el discu de la Banda de Gaites Llacín na nuestra tienda.