Torna a nacer un frangüesu n’Asturies setenta años depués

El Parque de Picos rexistró’l primer nacimientu d’un frangüesu dende’l desaniciu de la especie n’Asturies hai unes siete décades. Esti exemplar nuevu súmase a los 24 que viven nel cordal, toos naturales de los Pirineos, confirmándose asina la so adaptación.

Sicasí los téunicos tamién se muestren prudentes, porque l'ésitu reproductor del frangüesu suel ser baxu, sobre manera n'unidaes primerices. Nel meyor de los casos, la fase de cría del pitu nel nial va enllargase hasta xunu, cuando taría preparáu pa esnalar.

Los proxenitores son dos exemplares adultos: una fema de 10 años reintroducida en Picos nel 2010 y un machu d'unos 13 que s’estableció na zona nel 2013. La pareya crió na vertiente asturiana del macizu central y constitúi la primer unidá reproductora esitosa fuera de los Pirineos.

El personal de la guardería del Parque Nacional de Picos de Europa y de la Fundación para la Conservación del Quebrantahuesos que siguió'l procesu de reproducción constató que la pareya llevaba 51 díes guariando nel interior del nieru. La seronda pasada yá reparó comportamientos pre-reproductores y en xineru confirmó que la pareya s’instalara definitivamente n'una de les güecos del macizu asturianu y empezaba a guariar por relevos.

Esti mes los proxenitores yá tán faciendo les primeres cebes de la cría y los téunicos caltienen el siguimientu. Hai que recordar que’l frangüesu ta declaráu especie en peligru de desaniciu, polo que s'atopa nel nivel más altu de proteición na Xunión Europea.