Torna a celebrase la Xunta d’Escritores Asturianos trece años depués

Villaviciosa va acoyer esti sábadu y domingu la VII Xunta d’Escritores Asturianos, cola participación de 54 autores en meses d’alderique, presentaciones y otres actividaes sobre la lliteratura n'asturianu y gallego-asturiano. Cúmplense 30 años de la primera, celebrada en Villamayor, y 13 de la última, que tuvo como sede Llanes.

El Teatru Riera y la Casa de los Hevia va reunir la mayor parte de los actos de la Xunta d’Escritores, qu’entama la Conseyería d’Educación y Cultura xunto col Conceyu de Villaviciosa col oxetivu de “poner al día la situación de les lletres asturianes, al empar que reivindicar la so presencia na sociedá”. Asina convidóse a más de mediu centenar d’escritores n’asturianu y gallego-asturiano que van tratar asuntos como’l presente de la lliteratura asturiana, el relevu xeneracional polos escritores más mozos, la traducción d’otres llingües al asturianu, el papel de los medios de comunicación, la importancia de la lliteratura infantil y xuvenil, la salú de la crítica, la difusión y normalización de la producción cultural y la situación actual de la novela.

La gran novedá d’esta edición del alcuentru ye la presencia de trés autores que van dar la visión que se tien de la nuesa lliteratura fuera d’Asturies. Va ser el domingu al meudía nel Riera, cola participación de la poeta cordobesa Elena Medel, l’escritor portugués Jose Rui Teixeira y la escritora valenciana Anna Moner, que van participar al llau de Xuan Bello y Berta Piñán.

Otru de los momentos destacaos va ser l’homenaxe a Xosé Caveda y Nava que va celebrase’l sábadu a les 12.30 hores frente a la so casa natal. Otra manera, mientres la Xunta d’Escritores Asturianos va presentase’l documental ‘Escribiendo’l camín, 30 años de xuntes d’escritores asturianos’ (sábadu a les 10 hores nel Riera) y una revista conmemorativa de Formientu que va axuntar una muestra de los autores más mozos (sábadu a les 21 hores na Cafetería Avenida mientres una espicha que va contar cola actuación de L-R).

Como material de reflexón, va dase a los participantes un llibru coles aportaciones crítiques de dellos especialistes que dan la so opinión de los aspectos más relevantes de la lliteratura escrita n’asturianu y, asina mesmo, va agasayase a los asistentes con un númberu nuevu de ‘Trabatel. Revista eonaviega de lliteratura’ y va editase un númberu especial de ‘Friúz’. Más d’un centenar d’escritores confirmaron la so asistencia a estes xornaes, a la que tamién van dir persones que formen parte de la cadena del llibru y qu’intervienen na promoción de la lliteratura asturiana, como periodistes, críticos, téunicos de los servicios de normalización llingüística, representantes d’instituciones, editores y llibreros.