Torimbia, la playa amenazada

LLanes ye ún de los conceyos más atacaos pola presión urbanística. El llugar favoritu pa vacaciones y segunda residencia de bien de xente asturiano y, sobremanera de fuera, que pue permitise los altos precios de los xalés nes urbanizaciones de la rodiada del conceyu, afuégase en colonies de cases que suponen un cambeu radical nos usos del espaciu. Siendo'l ganchu de los sablones llaniscos parte importante del tirón turísticu y residencial del conceyu, resulta qu'al final son eses mesmes playes les que tienen que cargar colos impactos más negativos de la conversión de Llanes en coneyu d'ociu y vacaciones. Una d'estes playes, la de Torimbia, célebre por ser una de les playes nudistes más visitaes del conceyu, ye agora actualidá porque l'Ayuntamientu ta entamando yá delles oactuaciones que parez que nun casen mui bien cola lletra del Plan Especial d'Actuación que se redactare pa esta playa. El plan orixinal pa Torimbia incluyía un proyectu de rexeneración mediuambiental fechu pola Universidá d'Uviéu, y pensose cola idega de llibrar la playa de la masificación turística, contemplando puntos como una plantación d'arboles al llau del sablón o torgar l'accesu a coches. En cuenta d'ello, según denuncien dende AVALL (Agrupación de Vecinos y Amigos de Llanes) l'Ayuntamientu tracamundió'l plan, qu'agora presenta puntos conflictivos como enenchar el camín que baxa pa la playa hasta dos metros y mediu pa que pasen los coches o iguar places d'aparcamientu na baxada pa la playa. Según AVALL ello supón un impactu ambiental grave y amás entraría no illegal en cuantes qu'incumpliría dafechu les indicaciones pa Playes Naturales que vienen coles Directrices Subrexonales d'Ordenación del Territoriu y el Plan de Ordenación del Llitoral Asturianu (POLA). En protesta por esta actuación AVALL y la Sociedá Española d'Ornitoloxía quieren convocar a una concentración en Torimbia pa esti domingu a les 12 de la tardi.