Tolo d’Asturies presenta l'espectáculu ‘Llariegu 100% Directo’ y el conciertu ‘Asina suena Llangréu’

La VI Muestra Cultural Tolo d’Asturies presenta pa esti sábadu un conciertu espectacular. La Banda Gaites Llariegu va llevar a Llangréu el so ‘Llariegu 100% Directo’ y dellos artistes del conceyu entamen una actuación especial pa esti eventu.
 
El conciertu ta previstu pal sábadu, a les 22 hores, nel recintu ferial de la estación d’autobuses de Llangréu, sede tamién del restu d’actividaes qu’entamen pa esta fin de selmana l’Agrupación d’Etnografía y Folclor Reija de Llangréu. Los encargaos d’abrir la nueche van ser los integrantes de la Banda Gaites Llariegu, que van treslladar a la cuenca’l Nalón l’espectáculu baxo’l nome ‘Llariegu 100% Directo’ que fixeron el 27 d’abril del 2011 na Llaboral de Xixón –grabáu pa la edición d’un CD-DVD– con motivu del so decimoquintu aniversariu. L’agruapación saregana presenta una propuesta innovadora, cola participación de músicos de reconocimientu, y una puesta n’escena bien cuidada.
 
Tres l’actuación de Llariegu, llegará la otra propuesta novedosa de la nueche. Ésta lleva’l nome de ‘Asina suena Llangréu’ y trátase d’un espectáculu entamáu a costa fecha pa Tolo d’Asturies. Duerna, Marisa Valle Roso y la Banda Gaites Llangréu van interpretar cantares propios y otros nuevos compuestos pa la ocasión. Amás, los artistes llangreanos van convidar a xubir al escenariu a otros munchos músicos pa facer d’esti conciertu una actuación única. Por último, pa zarrar la nueche, los ḷḷenizos Spanta la Xente van facer baillar a los presentes.
 
Actividaes a lo llargo del sábadu y del domingu
 
Tolo d’Asturies va ufrir el sábadu y el domingu una riestra d’actividaes nel recintu ferial que complementen la esposición de vistimenta tradicional y los talleres pa neños y neñes preparaos a lo llargo de los dos díes. L’apertura de la muestra ta prevista pal meudía del sábadu, cola actuación de la Banda Gaites Conceyu Llangréu. Una hora más tarde, va celebrase una sesión vermú con asturianaes que van grabase pal programa ‘Sones’ de la TPA y, yá de tarde, a les 18 hores, una amuesa de deportes tradicionales. 
 
Mentes, pal domingu, a les 12.30 hores, va repetise l’amuesa de deporte tradicional, pa depués dar pasu a una actuación de la Banda Música Conceyu de Llangréu (13.15 hores). A les 17 hores va tener llugar la Muestra Coral de Llangréu, cola participación de Padre Coll, Escolinos de Padre Coll y l’Ochote Langreanu, pa siguir, a les 18.30 hores, col espectáculu que tien preparao Herbamora y la Escuela de Música Tradicional Reija de Llangréu. La clausura de Tolo d’Asturies ta prevista pa les 20.30 hores.