Tolo d’Asturies pasa a celebrase nel Teatru Nuevu de La Felguera

La Quinta del Nalón, Reija, Felpeyu y Taranus conformen el cartelu del VII Tolo d’Asturies, que camuda al mes d’ochobre y pasa a celebrase nel Teatru Nuevu de La Felguera. Les actuaciones van desendolcase'l sábadu de mañana y tarde.

Esta muestra cultural venía celebrándose nel mes de mayu na estación d’autobuses llocal, pero nesta ocasión l’Agrupación d’Etnografía y Folclor Reija de Llangréu y el Conceyu de Llangréu, organizadores d’esti eventu en collaboración cola Direición Xeneral de Política Llingüística, decidieron retrasalu a ochobre y treslladar toles actividaes al Teatru Nuevu de La Felguera, con entrada de baldre pal públicu. Unos cambios que nun impiden que Tolo d’Asturies caltenga la so filosofía d’apueste “claru y decidíu pola cultura tradicional y la música de calidá fecha n’Asturies”.

Asina, a les 12.30 hores, va tener llugar un conciertu de La Quinta del Nalón, formación compuesta por cinco de los meyores artistes del valle, cola so mocedá como denominador común: Anabel Santiago, Héctor Braga, Pablo Carrera y Marisa y Fernando Valle Roso. Yá de tarde, a les 17.30 hores, va actuar la Escuela de Música Tradicional Reija, con “un espectáculu bien interesante  diseñáu a costafecha pa Tolo d’Asturies VII, coordináu y dirixíu polos profesores” del centru, pa depués dar pasu a Felpeyu y Taranus. Los primeros, banda referente del folk asturianu, tán trabayando anguaño  nos que van ser los temes del so discu próximu, mientres que’l grupu de folk-metal continúa cola xira del Premiu al Meyor Cantar, gallardón qu’algamaron en febreru gracies a la pieza ‘Ensin ti’.