Toli Morilla va llevar les sos versiones de Dylan n’asturianu al Savoy

|

La sala xixonesa Savoy Drinks&Music va ser esti sábadu la sede d’un conciertu de Toli Morilla onde los sos aficionaos van poder sentir les sos versiones de Bob Dylan n’asturianu. Mentes, Rafa Lorenzo actúa esti vienres en Mieres.
 
Los ‘Diez cantares de Bob Dylan n’Asturianu’ de Toli Morilla tuvieron una gran repercusión nel mundu musical asturianu pola so calidá y la bona escoyeta de temes del afamáu cantante de Minnesota. Esti sábadu, los siguidores de Dylan y de Morilla van poder disfrutar d’estos temes y d’otros del cantautor asturianu nun conciertu nel Savoy (23.30 hores, 8 euros). Ésta va ser la primer actuación de Toli Morilla cola so banda nuna xira que tamién lu va llevar por dellos institutos d’Asturies, la Casa la Cultura de La Pola Siero (14 d’abril) y La Pola L.lena (20 de mayu).
 
Otra actuación destacada del fin de selmana ye la de Rafa Lorenzo esta tarde nel Centru Cultural Caxastur de Mieres (20 hores). Autor de temes n’asturianu y castellanu, nos sos conciertos en direuto presenta’l so repertoriu y pon música a poetes del sieglu XX como Lorca, Miguel Hernández o Alfonso Camín.
 
Otres opciones pa esti vienres ye’l conciertu d’Igor Paskual, precedíu poles bandes Nistal y Niño Malaluenga (22 hores, Acapulco de Xixón) y el power metal de los alemanes Rage (21 hores, Albéniz de Xixón). El sábadu atopamos l’actuación de Quique González n’Avilés (20.30 hores, Casa la Cultura) y, el domingu, el Concursu de Folclor Ciudá d’Uviéu (11.45 hores, Teatru Filarmónica) y los ‘Domingos corales: l’añada asturiana’ (12 hores, Antiguu Institutu de Xixón) col Coro Melsos, la Coral Polifónica Anselmo Solar y l’Asociación de Folclore Azabache.

Contador Estadistiques