Toli Morilla lleva l'insomniu al Trisquel de Xixón

Mañana xueves 24 Toli Morilla va facer la presentación del so llibru-discu "Nueche d'Insomniu" nel chigre "Trisquel" de Xixón. Pa l'actuación de mañana l'autor promete acudir con una proyección especial de diapositives y un montaxe de vídeu.

"Nueche d'insomniu" ye'l proyectu más personal na carrera del cantautor asturianu Toli Morilla, que baxo la etiqueta de "art-folk" presenta un proyectu musical qu'amiesta los cantares del cantautor xixonés con testos de escritores asturianos n'asturianu, ente ellos María Teresa González, Teresa Lorences, Rosa Taurán, Xulio Vixil, Manfer de la Llera, Xandru Fernández o Antón García. En cauna de les representaciones del espectáculu Toli Morilla cuida siempre muncho la escenografía, lo que fai de Nueche d'Insomiu un proyectu vivu, que casi se reinventa pa cada conciertu cola amestadura d'elementos estra-musicales qu'ayuden a crear un ambiente únicu, y ello ye que l'actuación de mañana nun va ser menos. Ello ye que pa l'actuación de mañana l'autor promete acudir con un montaxe de diapositives y un montaxe de vídeu que van facer de l'actuación en Trisquel una de les puestes n'escena más intimistes del "nueche d'insomniu". La cita ye a les 21:30h nel Trisquel, na Cai Marques de San Esteban de Xixón.