Toli Morilla, ganador del meyor cantar n'asturianu con "Azul y gris"

El cantar "Azul y gris" compuestu por Toli Morilla y inxertu nel so últimu discu "Entropía" convirtióse ayeri nel ganador del primer concursu al Meyor Cantar n'Asturianu, galardón que convocaba la Conseyería de Cultura del Gobiernu Asturianu y que garró por sorpresa al artista, que confesó nun tener nada preparao p'agradecer el reconocimientu al empar que manifestó la so emoción pol premiu. Lo mesmo'l premiáu que los otros candidatos, el grupu folk Asgaya, el cantante Carlos Rubiera y el grupu de reggae-ska La Tarrancha - namás faltó la banda folk de los Hermanos Tejedor por causa del avanzáu embarazu d'Eva Tejedor- interpretaron los sos temes nuna gala que se celebró nel Teatru Filarmónica d'Uviéu y na que participó como convidada especial la cantante mallorquina María del Mar Bonet, que ganó al públicu cola so interpretación personal del tema n'asturianu "Adiós casa de mios padres".



Nel Día Internacional de la llingua Materna, la cantante mallorquina reivindicó la "riqueza" que representa la variedá de llingües del estáu y calificó de "nacionalismu d'Estáu" y de "absurdo" el querer imponer el castellanu sobre les demás llingües". Bonet agradeció'l xestu "tienru" de la organización al convidala a la gala y nomala madrina de la primer edición del Premiu.