“Tol terror, lo realmente importante de la novela, sucede dientro de los personaxes”, apunta Aique Fernandi

‘La vieya’, la obra ganadora del II Premiu Radagast de Lliteratura Fantástica, Ciencia Ficción y Terror, yá ta disponible pa los llectores. La editorial presentóla esti xueves en Xixón con un alderique ente José Luis Rendueles y l’autor, Aique Fernandi, qu’aseguró que “tol terror, lo realmente importante de la novela, sucede dientro de los personaxes”.

Nicolás Bardio, responsable d’Ediciones Radagast, conduxo un actu que tuvo como sede’l llar de Cuatro Gotes Producciones nel barriu L’Arena y que s’abrió cola anuncia del fallu de la tercer edición del concursu, correspondiente al 2022, que foi p’Ana Pereira pa ‘Cuntaora’. Depués de la entrega del diploma conmemorativu, cedió la pallabra a Rendueles, qu’introduxo al escritor nacíu en Sotrondio.

“Si ‘Invisible’ –cola que ganó’l Premiu María Josefa Canellada de lliteratura infantil y xuvenil del 2018– ye una novela de terror psicolóxicu, ésta ye una novela más de terror primixeneu”, arrancó refiriéndose a la ‘La vieya’. “¿Yes un autor de terror?”, entrugó-y, a lo que Fernandi respondió “nun creas, yo diría que soi naturalista”.

“Pa min ‘La vieya’ ye un batulax de coses”, apuntó llueu Rendueles. Una historia sobre mieos, protagonizada por un matrimoniu que va’l monte y topa una borrina que los pon en contautu con otru mundu; una historia con munchos elementos, nos que Fernandi crea un mundu dende’l principiu, al estilu Tolkien, dende un ser primixeneu, el gran cuélebre, que crea universos coles llárimes, el sangre, la lluz y el so cantu, siendo la Tierra ún d’esos universos.

“Un posible orixe del mundu, unes gotes de feminismu, un chorru xenerosu d’ecoloxismu y una visión descreyida del mundu”, siguió’l tamién escritor refiriéndonse a la obra, ausente de diálogos. “Yera como un exerciciu. Yo quería que nun hubiere diálogos, porque quería concentrame nel mundu interior. Tol terror, lo realmente importante de la novela, sucede dientro de los personaxes, ye lo que sienten mientres ta a piques de pasar l’aición”, espresó’l de la cuenca El Nalón.

Enantes Rendueles apuntara que “ye una novela d’interior. Ta ambientada nun sitiu onde hai monte, hai viesques, cueves, pueblos, pero tola aición, lo más importante, ye mental. Historia con munchísimos ramales, concentrándolo muncho, faciendo llabor ferre a la hora d’escribir, concentrando tolo horror posible nel discurrir de los personaxes”.

“Punxi un poquiñín de min”

“Ye una novela que ta fecho a retales, que podéis vosotros dir construyéndovos les vuestres propies histories a partir d’ella –dixo refiriéndose al públicu presente–. Si la lleeis un poquiñín con detenimientu podéis aumentar los vuestros mundos interiores; espero, ésa yera la idea. Ye entretenida, lleese rápido y ye piquiñina, y pue guardase en cualquier monederu”, apuntó Fernandi, qu’añadió que “punxi un poquiñín de min. Val la pena conoceme un poquiñín, los que me conocen sobre too. Val la pena tener otru puntu de vista sobre les coses, sobre’l mundu”.

Pela so parte, el xixonés dixo que ye “una novela con una montonera de llectures distintes dafechu, porque ye un testu que trabaya a munchos niveles y eso fai que furrule mui bien. Tien un mundu feminista, otru mitolóxicu, otru ecoloxista y tamién veo una crítica mui clara a la sociedá d’anguaño, a cómo esti modelu de sociedá ta aplastando a la xente. Y dende esi puntu de vista ye como una novela mui amarga. El narrador llega a dicinos que dolor ye dicir amor”. Un aspeutu que tomó con humor Fernandi, que negó ser “un ser amargoxáu”.

Na semeya, Rendueles, Fernandi y Bardio. A la izquierda del editor, Pereira.