Todíu, canieḷḷa o cadril: pallabres del cuerpu humanu pa deprender y reforzar xugando

|
El cuerpu humanu Ḷḷena

Les escolines y escolinos de la Escuela Infantil El Nial, de Ḷḷena, yá cuenten cola última parte del xuegu del cuerpu humanu, centrada nes piernes. Con motivu del Día de la Llingua Materna recibieron esta ferramienta pa deprender y reforzar xugando pallabres na variante llocal del asturianu, como todíu, canieḷḷa o cadril.

“La intención ye que los nenos y nenes de Ḷḷena sientan que la escuela ye parte de la so realidá más cercana; por eso se buscaron les formes de la variante propia del conciyu. Promovela y reforzala ye un valor pal Conciyu Ḷḷena”, esplica David Suárez ‘Cai’, conceyal d’Educación, Cultura y Política Llingüística. La escuela infantil valora l'actividá de manera mui positiva, pol calter manipulativu y visual de los materiales.

El trabayu de la direición d’El Nial y de les educadores, les tresmisores del vocabulariu na escuela, va permitir asina que, al igual que fixeron previamente col restu del cuerpu, puedan deprender per aciu del xuegu cómo se llama dalgunes partes del mesmu, como’l muslu, la clica o la pirula. La entrega d’esti material fíxose efeutiva’l martes pasáu, 21 de febreru, Día Internacional de la Llingua Materna, y enmárcase dientro de la collaboración habitual que caltienen el SNL llocal y esti centru pa la normalización del idioma.

Contador Estadistiques