Tocando pelos Pueblos de la mano de los Humanitarios de Samartín

La muestra de música tradicional Tocando pelos Pueblos, iniciativa del colectivu Los Humanitarios de Samartín de Morea (Ayer), llega a la so novena edición. Anguaño, amás de los conciertos de los grupos invitaos -Tarañu, La Jambre y Andarilhos- va haber tamién una preba de sidra enantes de la muestra pa calecer l'ambiente.

Na muestra de 2005 topamos una perbona selección de grupos, con estilos bien diferentes no que cinca al tratamientu de la música tradicional. Per un llau van tar los asturianos Tarañu, formación que surde na primavera'l 2002 nel conceyu d'Ayer al xuntase seis amigos que bebieron d'estilos o fontes tan estremaos como ye la música tradicional, el rock o lo clásico. Yá tienen el so primer discu -Al xeitu de nenyuri- col que recibieron el preste del públicu folk asturianu. Pegando un blincu bien llargu llegamos hasta Jerez de la Frontera, d'onde ye otru de los grupos que van participar na muestra. Son La Jambre, sestetu de Jerez ye un proyectu de recuperación y actualización de la música tradicional andaluza, que convivió col flamencu hasta quedar dafechamente arrequexada pola mor d'esti estilu musical y d'otros más serondos que foron garrando más puxu. Esti grupu fai una música popular, davezu cantada y que s'interpretaba en toa riestra d'actos sociales, celebraciones y fiestes.

Pieslla'l cartel de Tocando pelos pueblos Andarilhos, banda portuguesa que naz en 1991. Son un grupu que promociona y esparde la música tradicional portuguesa al traviés d'actuaciones y participación en toa mena d'espectáculos. Trabayando na etnografía y nos instrumentos tradicionales, el grupu desendolca nuevos soníos onde interpreten y recreen aquellos temes que son parte del padrimoniu cultural portugués. Los conciertos van ser el día de payares ales 20:00 hores nel Auditoriu Cine Carmen de Morea. Como previa estos conciertos, a les 18:00 hores va haber una preba de sidra a eso de les 18:00 hores na cai Eloy Martino, énte'l propiu Cine Carmen, onde amás tamién va haber músicos tradicionales pa que la música nun pare en Morea en nengún momentu.