Tinéu entra nel mapa de la contaminación

Los datos nuevos acabante asoleyase sobre Calidá del Aire n'Asturies amiesten Tinéu a la llista d'estaciones de medición onde se perpasen los topes de contaminación.

La información diola a conocer la organización Ecoloxistes n'Acción, que recibe parte puntual de los adtos de calidá del aire qu'ellabora'l Serviciu de Xestión Ambiental, organismu oficial dependiente de la Conseyería de Mediu Ambiente. Ello ye que l'últimu parte del Serviciu amiesta dos estaciones más de control a la llista de les que perpasen los topes de contaminación permisibles. Les dos estaciones en cuestión son les de La Barca y Villanueva, dambes en Conceyu de Tinéu y pertenecientes a la rede que xestiona la Central Térmica del Narcea, de la empresa Iberdrola. Nes dos estaciones valtáronse los valores tope diarios pa les partícules menudes del tipu PM10, un tope que ta asitiáu llegalmente nos 55 mg por metru cúbicu d'aire más de 35 vegaes, llegándose nel casu de la estación de Villanueva a los 130 mg/m3, muncho más del doble del tope llegal.