thyssenkrupp AG vende la so estaya d’ascensores, con 900 emplegos n’Asturies, a un consorciu por 17.200 millones d'euros

La empresa alemana thyssenkrupp AG ta acabante de llegar a un alcuerdu pa vender la so estaya de teunoloxía d’ascensores a un consorciu formáu por Advent, Cinven y RAG Foundation pol preciu de 17.200 millones d’euros. Nesta división de la empresa tán les plantes de Mieres y Xixón que dan emplegu a 900 persones.

La intención de dambes partes ye zarrar la venta al final del añu fiscal y reinvertir parte de les perres, 1.250 millones, na propia empresa saliente. Enantes será necesario algamar el preste de les autoridaes competentes a la operación.

“Con la venta tamos marcando’l camín pa que thyssenkrupp sía esitosa. Non sólo algamamos un mui bon preciu de venta, sinón que tamién completamos una venta rápida. Esto agora ye clave pa nós p’atopar el meyor equilibriu pal usu de los fondos. Vamos reducir la deuda de thyssenkrupp lo máximo posible y al empar invertir lo máximo razonable nel desarrollu de la compañía. Con esto, thyssenkrupp pue acelerar otra vuelta”, aseguró Martina Merz, direutora executiva de thyssenkrupp AG.

N’Asturies la compañía cuenta con una planta en La Perea y Baíña (Mieres), un centru d’I+D+i en Xixón y una delegación de caltenimientu d’ascensores. En total da trabayu a 900 persones, que nun van vese afeutaos pola operación.

Na imaxe, planta de la compañía en La Perea (Mieres). Semeya propiedá de thyssenkrupp AG.