The Monkey Club acueye un homenaxe a Igor Medio y Carlos Redondo

En San Xuan cumpliéronse cinco años de la muerte d'Igor Medio y Carlos Redondo nun accidente de tráficu con Felpeyu camín de Catalunya. La música asturiana torna a homenaxealos esti martes nel xixonés The Monkey Club.
 
La cita va ser na sala asitiada frente a la Escalerona –antiguu Dompedro– a partir de les 21 hores y mantién el mesmu espíritu del espectacular conciertu-homenaxe celebráu na playa d’El Natahoyo y, nos años siguientes, nel desapaecíu Savoy Drinks&Music. Nesta ocasión van xubise al escenariu de The Monkey Club, Los Izquierdos, Lucas y Los Patosos, Mamy Carter, Sangrientos, Radio Fox, Replay, Manguanes y una banda formada por Rafa Kas y Jaime Belaustegui. Amás, tamién va actuar Eva Redondo, fía de Carlos, con un grupo de compañeros del Conservatoriu.
 
El cartel del homenaxe va ser ‘rockeru’ na so práutica totalidá, con especial protagonismu de la música de Los Locos, anque tamién van dexase ver munches persones del mundu folk pela sala xixonesa. La entrada pa presenciar toles actuaciones ye de baldre.