Texón axunta en ‘Media vida: poemes y cantares’ la so producción poética

Quince años de producción poética de Pablo Texón queden recoyíos en ‘Media vida: poemes y cantares’, llibru editáu por Saltadera que se presenta esti martes en Xixón. Inclúi’l so poemariu ‘Toles siendes’, Premiu Nené Losada Rico del añu 2005, yá escosáu.

L’autor nacíu en Felechosa nel 1977, con 40 años cumplíos recién y paternidá estrenada, repasa con esta antoloxía la so obra frente a un tiempu de cambiu. Asina, en ‘Media vida: poemes y cantares’ inclúi los sos llibros editaos hasta la fecha, los poemes inéditos, los cantares que foi perfaciendo pa diversos grupos musicales de la escena asturiana, les traducciones de Carver y un precisu y bien interesante apéndiz sobre la concepción poética de Wittgenstein.

D’esta forma, el llector va poder disfrutar de los poemes de ‘Toles sindes’, col que ganó’l Premiu Nené Losada Rico nel 2005, yá escosáu, ente otros munchos. “En xunto, ‘Media vida’ resulta una obra na que, a pesar de la variedá de llinguaxes usaos nella, rescampla la coherencia d’una mesma voz”, apunten dende Saltadera.

Esta tarde va tener llugar la presentación del llibru en Xixón, a les 20 hores en La Buena Letra, actu que va tar presentáu por Xandru Fernández y nel que van tar presentes, amás del escritor, l’editor Antón García y Gonzalo Suárez, fíu d’Aurelio Suárez, autor de la ilustración escoyida por Texón pa la cubierta, de nome ‘Entre dos días’ (1952) y perteneciente a los fondos del Muséu de Belles Artes d’Asturies.