Terra cayó en Llangréu

La xigantesca filial de Telefónica volvió a palmar perres otru añu más. Nel exerciciu 2.001, la multinacional de servicios na internet Terra-Lycos perdió 566 millones d'euros, 11 más que nel añu 2.000. De cualquier manera, los responsables de Terra dicen que la perda taba nel marxe que teníen previstu y camienten que la cosa va meyor que va un añu, ya que tuvieron un 22% más d'ingresos que nel 2.000 mientres que menguaron los costes. Terra tamién fexo más clientes de pagu, pero la mengua d'ingresos en propaganda tres los atentaos del 11-s estropió'l resultáu final.La nota de prensa oficial de Terra nun fala d'otres coses como que bien de los sos ingresos vienen de vende-yos conteníos y propaganda a otres empreses venceyaes al grupu Telefónica o yá n'otra estaya, que de xuro interesará al internauta mediu, de los problemes que dan les sos conexones ADSL. Aparte de l'anuncia de los sos resultaos oficiales, Terra ye noticia n'Asturies porque la Brigada de Delitos Informáticos de la Policía Nacional anda en Llangréu a la gueta del hacker qu'estragó va unos díes el serviciu de foros de Terra con un unviu de correos masivos. La única pista qu'hai de momentu ye una dirección IP y un interrogatoriu a un sospechosu que resultó inocente…

Contador Estadistiques