TermAst incorpora una propuesta de bioquímica y bioloxía molecular, “un campu que crea termiloxía nueva toles selmanes”

El biólogu Xurde Menéndez Caravia ye’l responsable de la decimosétima propuesta de TermAst. Trátase de una ‘Terminoloxía de bioquímica y bioloxía molecular’, “un campu que ta creciendo muncho nos años últimos y que crea terminoloxía nueva toles selmanes”, que completa la de bioloxía de Xosé B. Álvarez Álvarez.

La Universidá Asturiana de Branu (UABRA) foi’l xerme d’esta propuesta terminolóxica. “Yá esistía’l TermAst de bioloxía y salió en Cangas la posibilidá de que me punxera con ésta qu’afondara nestos campos concretos”, esplica Menéndez Caravia, biólogu que ta faciendo la tesis doctoral nel equipu del doctor Carlos López-Otín na Universidá d’Uviéu.

Meses después, la ‘Terminoloxía de bioquímica y bioloxía molecular yá ye una realidá. “Ye un campu que ta creciendo munchos nos años últimos y que crea terminoloxía nueva toles selmanes”, apunta’l tamién músicu, intérprete de gaita, curdión y bandurria, que recoyó “unes 400 entraes, con una pequeña definición y el términu en castellanu”.

Asina, dende ‘acéntricu’ –“dizse del cromosoma, o cachu de cromosoma, que nun tien centrómeru”– a “zimóxenu” –“precursor enzimáticu que tien que se procesar per aciu de proteólisis pa xenerar el enzima activu”, atopamos términos como ‘ecosfera’, ‘isótopu’, ‘patrimoniu xénicu’ o ‘uridín trisfosfatu’.

Tres la ‘Terminoloxía eleutoral básica’

El trabayu de Menéndez Caravia ya ta disponible en TermAst, iniciativa entamada nel 2009 pola Academia de la Llingua Asturiana con Softastur y el Colexu d’Inxenieros n’Informática del Principáu d’Asturies. ‘La Terminoloxía de bioquímica y bioloxía molecular’ socede a la ‘Terminoloxía eleutoral básica’ qu’espublizó’l mayu pasáu Héctor García Gil.

L’oxetivu de TermAst ye recoyer iniciatives individuales o grupales de propuestes terminolóxiques en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu, será la institución académica la que dirá inxiriéndolos dientro de los sos calces normativos.