Tercer selmana de cayíes nes bolses

La baxada del dólar y la xuba del preciu del petróleu echaron a los inversores de los parqués. Tornen otra vegada más les típiques duldes sobre les perspectives macroeconómiques, mentantu les xubes d´esti veranu camuden en recoyida de beneficios pa unos inversores que nun s'enfoten nel mes d´ochobre. La selmana en que l´Ibex-35 perdía la barrera sicolóxica de los 7.000, apaecíen les perspectives económiques pal 2004 de los Presupuestos Xenerales del Estáu, que pasen por caltener un crecimientu del 3%, siguir col déficit cero y crear 300.000 empleos anque'l tantu por cientu de paraos nun varíe.



Les estadístiques más destacaes de la selmana pasada foron la encuesta de la Universidá de Michigan que dio 87,7 puntos cuando se contaba con 88,5, y la tasa de crecimientu de los EEXX nel segundu trimestre del añu, que col 3,3%, quedó penriba de lo esperao. N´Europa diose anuncia del mal datu del preciu de les importaciones d´Alemaña (+0,8%) y de los precios de la producción en Francia, que col +0,2%, entraron nes previsiones de los economistes. Nuna selmana mala pa les bolses del vieyu continente, Llondres cayó'l 1% y París, Francfort y Milán trancaron tamién en perdes. Los índices de Wall Street tamién pesllaron la selmana pasada a la baxa.

N'España, mala selmana pal Ibex que se tien agora nos 6.800 puntos, lloñe de los másimos de va un mes. Nel conxuntu de la selmana l´ibex baxó'l 4,1% colo que yá son tres selmanes de perdes. L´Índiz xeneral de la Bolsa de Madrid mangose nos 723,58 puntos con una cayida selmanal penriba´l 3% mentantu que´l tecnolóxicu Nuevu Mercáu baxó un 4,60% hasta los 1.776,50 puntos.

L´anuncia de la selmana foi la decisión del SCH de mercar capital de la petrolera CEPSA, lo que supón romper el tratu que tenía Botín colos sos socios de Total. De fechu, el bancu de Santander dio anuncia d´una OPA sobre´l 16% de CEPSA por 1.200 millones d´euros. A los inversores presto-yos a esgaya la maniobra, según se conoz pola xuba del valor de CEPSA, que ganó un 15% na selmana. Nel Grupu Telefónica, namás peslló en positivo Terra. La concentración del poder nel PresidenteAlierta desarma el supuestu "gobiernu corporativu" de Telefónica, y la salida del conseyeru delegáu, Fernando Abril-Martorell, tampoco nun diz bien de la operadora. Ente les perdes destaquen BBVA, SCH, Bankinter, Bancu Popular, Arcelor, Iberia, Sogecable, Indra, Amadeus, Inditex, Iberdrola y Acerinox, y nes ganancies, Altadis, Vallehermoso-Sacyr, ENAGAS, NH Hoteles y Inmocaral, que xubió'l 20% cola entrada nel so capital d'Alicia Koplowitz.

Los países de la OPEP decidieron baxar la producción a 900.000 barriles al día lo que va suponer una xuba d'equí a poco nel preciu del petróleu agravada pola inestabilidá en países productores como Iraq, Venezuela y Nixeria. Va ser difícil caltener el preciu nos 22 dólares barril, colo que ye fácil que se mangue penriba los 30 dólares, lo que pue poner en peligru la economía de dellos países de la OCDE.

A la contra, l´oru ta medrando a esgaya, quedando en en 380 dólares la onza dempués de marcar másimu hestóricu nos últimos siete años. Esti metal preciosu torna otra vegada a ser abellugu pa inversores con duldes. L´euru recuperó terrén énte'l dólar y el cambéu ye agora de 1,1485 unidaes. La moneda norteamericana ta perdiendo terrén tamién cola moneda xaponesa, y nel mercáu de renta fixo, los bonos siguen meyorando resultaos.