Tensa la cuerda ente PSOE y IX-BA por Caliao

Izquierda Xunida - Bloque por Asturies denunció esta mañana la esistencia d'una "intoxicación informativa" interesada por parte del Gobiernu pa presentar a la coalición d'izquierdes como fuerza favorable a la construcción del embalse de Caliao (Casu), la gran infraestructura hidráulica prevista p'Asturies y pola que los socios mayoritarios de gobiernu de la FSA-PSOE y el gobiernu central tan faciendo un fuerte apueste.

Ello ye que la construcción del gran banzáu del Nalón, que ta dando yá los sos primeros pasos col encargu del estudiu d'impactu ambiental, ye ún de los temes qu'enfrenten a socialistes con IX-BA, fuerza política contraria a la infraestructura y que presentó nel so día unaa Proposición non de Llei na Xunta Xeneral del Principáu na que mandaba la realización d'un estudiu sobre los recursos hídricos, usu y xestión del agua n'Asturies que tendría d'encamentar o non la construcción del embalse, un estudiu del que nun volvió a sabese hasta la fecha.

Según afirma IX-BA, el mesmu Secretariu Xeneral del Territoriu y Biodiversidá Antonio Serrano alvirtiere nos pasaos díes a delles organizaciones ecoloxistes que "si bien en primeres IX/BA tuviere una posición contraria al proyectu, agora taba a favor". L'anuncia del Secretariu llevó a una llamada del mesmu conseyeru Francisco García Valledor, pa desmintir tala información. Dende IX - BA afírmase que "Nun sabemos cuál ye l'orixe de la información que dio'l Secretariu Xeneral, si ye de la so collecha o si vien de fontes de mediuambiente del Gobiernu Rexonal, lo que diba ser mui grave. En tou casu y p'aclarar esta intoxicación interesada salimos públicamente'l pasáu sábadu pa denunciar la falsedá". Amás d'albidrar una posible inttervención interesada de la FSA, la coalición d'izquierdes atacó directamente al PSOE, que llegare nel so día al Gobiernu del Estáu con un discursu contrariu a les grandes obres hidráuliques y pidió-y a la ministra Narbona "qu'aclarie cuála ye la so posición porque la nuestra ta bien clara".