"Tenemos una gran nación y sobre manera tenemos españoles", diz Rajoy n'Asturies

El presidente del Estáu en funciones, Mariano Rajoy, tuvo esti xueves n'Asturies pa visitar una ganadería en Samartín de Podes.

Foi una parada rápida, d'hora y media, pa depués siguir camín de Galicia, onde tenía una axenda eleutoral más amplia. Acompañáu de Susana López Ares, candidata por Asturies de la coalición PP-Foro, y Mercedes Fernández, presidenta del PP asturianu, tuvo na ganadería Carbayeda, onde defendió'l sector llactéu y emponderó la importancia que tien el campu pal desarrollu del Estáu, reconociendo les dificultaes qu'atopa y que promete solucionar. "Pela nuesa parte siempre tendrán el nuesu sofitu constante al esfuerciu conxuntu de quienes trabayen y tán al frente de les esplotaciones", remarcó Mariano Rajoy.

Na so visita prebó la sidra, aldericó colos vecinos y tuvo tiempu a tocar otros temes, nengún sobre temes d'importancia p'Asturies, como la minería o la varienta de Payares, igual que fixera'l socialista Pedro Sánchez la xornada anterior n'Uviéu. "Tenemos una gran nación y sobre manera, que ye lo más importante, tenemos españoles", aseguró, al empar que destacó que "el cambiu empezó hai yá cuatro años col PP; sería un error dar marcha atrás".