“Temos qu’axeitar el Estatuto á realidá d’Asturias y miyorar a proteición das nosas llinguas”, declara Barbón

El presidente Adrián Barbón, delantre del retratu de Gaspar Melchor de Xovellanos obra de Goya espuestu na so casa natal, avanzó nel so discursu pol Día d’Asturies que “en poucos días” va empezar los contautos pa la reforma estatutaria. “Temos qu’axeitar el Estatuto á realidá d’Asturias y miyorar a proteición das nosas llinguas”, afirmó.

Nun mensaxe nel qu’emplegó les trés llingues falaes nel país, Barbón fixo usu del gallego-asturiano pa tratar la parte referente a la modificación de la norma autonómica que, ente otres cuestiones, va incorporar la oficialidá d’esti idioma y del asturianu, pa lo que se necesita’l sofitu de 27 de los 45 diputaos de la Xunta Xeneral. “Este mesmo ano imos encarar ademáis a reforma del Estatuto qu’este decembre fai cuarenta anos d’esistencia”, principió.

El socialista siguió afirmando que “temos qu’axeitalo á realidá d’Asturias y miyorar a proteición das nosas llinguas. En poucos días hei empezar os contactos cos grupos parlamentarios que cren nel estao autonómico”.

Alcuerdu presupuestariu pa fortalecer la creación d'emplegu

Enantes, n'asturianu, Barbón espresara que "Asturies precisa la mayor unidá y entendimientu posibles. Necesitamos un pactu social nuevu que tenga continuidá nun alcuerdu presupuestariu que dexe destinar hasta l’últimu euru a fortalecer la creación d’emplegu". Tamién "que’l Gobiernu estatal asegure’l cumplimientu del calendariu d’execución de les nuestres comunicaciones y qu’incorpore meyores qu’aforren situaciones discriminatories nel usu de les infraestructures". 

"Na llista de deberes inmediatos apremia l’usu de los fondos europeos. Ye otru oxetivu que precisa de cooperación, d’intelixencia y de la implicación a fondu de la iniciativa privada p’algamar tol provechu. Yá nun hai dulda de qu’estos recursos estraordinarios van impulsar la tresformación económica d’Asturies, pero tenemos la obligación colectiva d’acertar, de nun esbaratar una ocasión estraordinaria", siguió.

Por último apuntó que "la modernización d’Asturies ta en marcha y nun se pue aparar. Tenemos que la acompañar con reformes ambicioses, ensin consentinos retrasos que namás diben valir pa estorbar el nuestru desenvolvimientu. La meyora de l’Alministración pa facela más rápida y efectiva, y l’apueste decidíu pola ciencia y la investigación, que va ser inclusive más fuerte no que queda de llexislatura, resulten indispensables".

Semeya obra d'Armando Álvarez.