Telegram n’asturianu suma más de 700 descargues en poques hores

La comunidá Softastur punxo esti vienres a disposición de tolos usarios de dispositivos Android l’aplicación de mensaxería nel intre Telegram en llingua asturiana. A media tarde, el númberu de descargues superaba les 700.

Enol Puente encargóse de coordinar la torna al asturianu d’esta aplicación de códigu abiertu que nun apara de ganar terrén a WhatsApp. Pa ello contó cola collaboración de Xandru Martino y del restu del equipu de Softastur, comunidá que ye la responsable de que los usuarios asturianos dispongan d’una cantidá importante de software llibre na llingua del país, ente los que destaca’l sistema operativu de base Linux, Ubuntu. El mozu mierense, de 19 años, taba trabayando de manera individual col Telegram y “comenté-ylo a la xente de Softastur, que tamién taba col tema, polo que decidimos facelo xuntos”.

Pocu tiempu depués, Telegram n’asturianu yá ye una realidá. “Trátase d’una aplicación de mensaxería nel intre pa falar colos collacios y familia pel móvil y el PC”, esplica Puente, que destaca la so privacidá y seguridá frente a la que presenta WhatsApp. Les más de 700 descargues que tien rexistraes el servidor de Softastur a les poques hores de colgar esta versión n’asturianu ye “too un ésitu” pa Puente, qu’afirma que Telegram “ye una ferramienta perbona pa la normalización del idioma”.

Les persones que quieran instalar Telegram nel so móvil Android –nun ta disponible pa iPhone por mor de la política de códigu zarráu d’Apple– namái han de siguir unos pasos cenciellos que se detallen na web de Softastur. Pa la xente que yá tenga l’aplicación nel móvil, Puente recomienda borrala pa instalar la versión nueva, yá que se conserven tolos datos, a esceición de les charres privaes.

Android, nunos meses

El siguiente pasu pa facer una vida diaria n’asturianu dafechu colos nuesos dispositivos móviles n’asturianu va ser contar con Android n’asturianu. Softastur yá tien tol trabayu desendolcáu y los usuarios van poder disfrutalu nunos meses na gran mayoría de dispositivos del mercáu con esti sistema operativu.