Telecomunicaciones sigue con Radio QK un proceder asemeyáu al fechu con Radio Sele

La Jefatura Provincial de Telecomunicaciones unvió una carta a la comunidá de vecinos onde Radio QK tien instalada l’antena pa identificar al propietariu de la mesma baxo amenaza de multa. El proceder ye similar al fechu con Radio Sele.
 
El direutor de Telecomunicaciones n’Asturies nuevu, José Antonio Díez Menéndez, utiliza con esta radio uviedina un proceder asemeyáu al que punxo en marcha cola única emisora cola so programación dafechu n’asturianu. Nesta ocasión, esti órganu dependiente del Ministeriu d’Industria, Turismu y Comerciu, unvió ayeri una carta al presidente de la comunidá de vecinos, acompañada d’una semeya, pa qu’identificara al propietariu de la antena dende la que Radio QK emite la so señal nel 107.3 de la FM. De nun facelo, Telecomunicaciones amenaza con una multa que podría llegar a los 500.000 euros.
 
“Yera dalgo que yá esperábemos depués de lo acontecío con Radio Sele”, esplica David Fernández, miembru de l’asamblea de Radio QK.racha, que considera que’l proceder de Telecomunicaciones “ye mui feu al involucrar a la comunidá de vecinos” nesti asuntu cuando “la responsabilidá ye de nós”. Sicasí, les persones que faen furrular esta radio uviedina de 28 años de vida dicen tar tranquilos “porque sabemos que tenemos la llei de la nuesa parte. Nun somos una radio comercial y nun facemos nada illegal”.
 
Nesi sen, Fernández apunta que Díez Menéndez “paez nun saber mui bien la diferencia ente una radio con ánimu d’arriquecimientu y una que non” y asegura que’l centru emisor de Radio QK “cumple tolos requisitos llegales y nun crea interferencies”. De primeres, nuna asamble celebrada ayeri, los miembros d’esta emisora uviedina decidieron “proceder lo más pronto posible a identificanos como propietarios de l’antena y lliberar a la comunidá de cualquier responsabilidá pa, llueu, poner en marcha les aiciones pertinentes pa enfrentanos a esti ataque”, apunten nun comunicáu.
 
Sofitu a Radio Sele
 
Esta actitú de Telecomunicaciones contra les radios comunitaries nun ye nueva, yá que’l pasáu 25 d’ochobre el direutor nuevu nel país obligó a Radio Sele a retirar la so antena al considerala illegal. Ello obligó a los responsables de la emisora n’asturianu a buscar un llugar nuevu onde poder instalar una antena, tovía ensin ésitu, y poder emitir otra vuelta al traviés del 106.1 de la FM. De momento, Radio Sele continúa coles emisiones per Internet, anque dende güei va ser posible sentir dalgunos de los sos programes per analóxicu gracies al sofitu de Radio QK.
 
Asina, los responsables de la radio que pertenez al Club Cultural d’Uviéu van emitir tolos programes en direutu de Radio Sele pela so señal (107.3 de la FM) siempre que nun coincidan colos propios. Una muestra de solidaridá que va continuar hasta que Radio Sele pueda normalizar la so situación.