Telecomunicaciones obliga a Radio Sele a zarrar la so emisión pel FM

A les 10 hores d’esti martes, Radio Sele cortó la so emisión pel FM por decisión del xefe nuevu de Telecomunicaciones n’Asturies –dependiente del ministeriu–, José Antonio Díez Menéndez. Agora namái va poder sentise per Internet.

La xente que, como toles mañanes, prendió la radio pa sentir la única cadena que dende hai 25 años emite en llingua asturiana llevó la sorpresa desagradable de nun atopar a Radio Sele nel 106.1 FM. La razón, la decisión de Díez Menéndez de nun dexar emitir más a esta radio comunitaria col añadíu d’involucrar a la comunidá de vecinos onde la emisora tien colocada l’antena. “El domingu vinieron el presidente y secretariu de la comunidá asustaos porque llegó-yos una carta que dicía que teníen una antena illegal y que, de non quitala, podíen llegar a recibir una multa d’hasta 500.000 euros”, rellata Xuan Xosé Mariño, direutor de Radio Sele, que diz nun entender por qué dende la delegación d’Asturies del Ministeriu d’Industria, Turismu y Comerciu “nun se punxeron en contautu de forma direuta con nós cuando tienen los nuesos datos y el responsable anterior llamónos en delles ocasiones, como cuando tuvimos que cambiar del dial pola frecuencia de la RTPA nel 106.5”.

Pa tratar de solucionar esti asuntu, Mariño dirixóse ayeri a la xefatura de Telecomunicaciones d’Asturies, asitiada na cai uviedina de Campumanes, onde Díez Menéndez comunicó-y que debía de zarrar la emisora darréu, ensin la posibilidá de llegar a un alcuerdu. “Gerardo Calzón, l’anterior responsable, que xubilóse hai poco, yera una persona cola que se podía tratar, pero col responsable nuevu nun hubo manera de dialogar”, señaló Mariño. L’argumentu de Díez Menéndez ye que va zarrar toles emisores comunitaries qu’emiten ensin llicencia. Nesi sen, el direutor de Radio Sele recuerda que la cadena algamóla nel 1999, pero que foi retirada pol Gobiernu d’Álvarez Areces pa dala a Punto Radio, “una cadena que dexó d’emitir dende Asturies el pasáu día 21 y que tola so emisión faila agora dende Madrid”.

“Con esta decisión del ministeriu quedámonos ensin poder sentir na radio una canción fecha n’Asturies o falar asturianu”, llamenta Mariño, que, sicasí, recuerda que les emisiones van siguir per Internet. Esti vienres, les persones que formen parte de la familia de Radio Sele van aconceyase a les 19 hores pa decidir qué midíes tomar y posibles movilizaciones pa denunciar “esti atentáu nuevu a esta emisora n’asturianu”.