TeleAsturias va emitir la versión asturiana del western ‘McLintock’ la selmana próxima

El xueves día 3 y el domingu 6, coincidiendo cola XXXIII Selmana de les Lletres, TeleAsturias va emitir la versión n’asturianu de ‘McLintock’. La cadena va facer un programa previu nel que va presentar la película y el so doblaxe.
 
La cinta, un ‘western’ cómicu, fala de la historia d’un terrateniente machista d’Arizona abandonáu pola so muyer por sospeches d’infidelidá que vuelve a atopar a lo so ex esposa años depués en casa d’una fía común tres conocer que ta prometida con un mozu. Ello provocará engarradielles ente ellos y una bona riestra de situaciones divertíes. Los encargaos de poner voz a los personaxes de ‘McLintock’, dirixíos pol actor y direutor escénicu Antón Caamaño, foron el propiu Caamaño (John Wayne), Mayra Fernández (voz de Maureen O’Hara), Carlos Alba, Fernando Marrot ‘Win’, Inma Rodríguez, Rodrigo Alba, Fernando de Luxán, Eladio Sánchez, Norberto Sánchez, Arantxa Fernández, Armando Felgueroso, Alberto Álvarez Peña, Carlos González, Hugo Costa y Jessica M. de la Paz, ente otros.
 
L’estrenu na televisión del llargumetraxe dobláu al asturianu, obra de Gonzali Producciones, va tener llugar el xueves a les 22 hores. Mentes, el domingu, a les 15.30 hores, TeleAsturias va repitir la emisión de la película. Les persones que nun tengan sintonizada la canal, pueden atopala nel dial 66 de la TDT, mentes que la xente que nun resida n’Asturies va poder ver ‘McLintock’ al traviés d’Internet.