Tejedor y Spanta la Xente, nel Mercáu Tradicional La Flor de Ḷḷena

|
Cartelu del XIV Mercáu Tradicional La Flor de Ḷḷena

El Conciyu retiró la organización del eventu a Rebelgu, responsable nos años últimos, lo que llevantó polémica en La Pola. La Banda Gaites Güestia va encargase del mesmu.

Tolos grupos muncipales (IX, PSOE y PP), a esceición de Compromisu por Ḷḷena, sofitaron esta midida que provoca que la Xunta Cultural Rebelgu, que tenía zarrada tola programación pa la edición d'esti añu del Mercáu Tradicional La Flor de Ḷḷena, la decimocuarta, dexe d'organizar esta celebración que tien como sede'l barriu La Caleya. "La idea de faer esti mercáu parte del asociacionismu y non del Ayuntamientu, entamándolu Pies Xingones y dando'l relevu a Rebelgu, polo que según el nuestru criteriu, carez de sentíu convocar un concursu públicu pa decidir qué asociación sedrá la organizadora del eventu. Por poner un exemplu, naide discute quién entama el Festival Astur Romano de Carabanzo, y por ello se fae una adxudicación direuta ensín concursu públicu", critiquen dende esta organización.

El cambiu, sicasí, nun va modificar la estructura d'esta celebración dientro de les fiestes de La Flor qu'axunta a centenares de persones en La Caleya, con especial afluencia na nueche del sábadu. Asina, Güestia anuncia la participación de 80 artesanos nel mercáu y les actuaciones de Tejedor y Spanta la Xente de magar les 23 hores del sábadu; de Mapi Quintana y Elías García, a les 13.30 hores del domingu; y de Vicente Prado 'El Pravianu' y Celestino Rozada nun festival de canción asturiana'l a les 19 hores.

D'igual forma, a les 16.30 hores del sábadu, va celebrase'l VII Alcuentru Folclóricu La Flor de Ḷḷena cola participación de Liseo Quiñones, La Flor de Xaranzaina, Bandina Tradicional L'Andecha, Imanol y Baquero, Los Zamarrones y la Banda Gaites Güestia.

La 'jira', el llunes

El Conciyu Ḷḷena entama un destacáu programa de festexos pa estos cuatro díes que finen el llunes cola tradicional 'jira' al prau de La Flor. Ente les munches actividaes va haber trés verbenes coles orquestes Kosmos y Trapecio (mañana), Super Hollywood y Dúo Fusión (sábadu), y Casting (domingu).

AdxuntuTamañu
Image icon Programa del sábadu128.76 KB
Image icon Programa del domingu128.38 KB
Contador Estadistiques