Tejedor va presentar el so trabayu nuevu’l domingu nel Niemeyer

‘Positivu’ ye’l nome del trabayu nuevu de Tejedor, nel que José Manuel y Javier Tejedor incorporen la voz de Silvia Quesada en sustitución d'Eva. Los dos hermanos van presentar los temes d’esti discu’l domingu nel Centru Niemeyer.
 
La intención de José Manuel y Javier ye que la cita del Niemeyer sía especial, polo que van arodiase de gran parte de les persones que collaboraron nesti discu compuestu por doce temes, de les que diez son composiciones nueves, dances, muñeiras, saltones y cantares con raigaños tradicionales, y les otros dos un set de xotes y ‘El veleta’. Asina, ta prevista la presencia nel auditoriu d’Iñaki Plaza y Jon Garmendía (txalaparta y tables), Guadi Galego (voz), Chus Pedro (voz), Miguel Herrero (fliscorno y trompeta), Tino Cuesta (saxofón), Pepín de Muñalén (flauta), Juanjo Díaz (percusiones), Karan Casey (voz) y Niall Vallely (concertina).
 
Mentes, la banda de Tejedor nesti conciertu va tar formada por Silvia Quesada, Horacio A. García (contrabaxu), Ramón G. Morán (teclaos), Jesús Castro (batería), Alberto Ablanedo (bouzouki) y Rubén Álvarez (guitarra). La hora d’entamu del conciertu va ser les 20 hores y el preciu únicu de la entrada ye de 12 euros. Ésta pue mercase na taquilla del Centru Niemeyer, nel teléfonu 902.106.601 o per Internet.
 
Hai que destacar que ‘Positivu’, cuartu discu de Tejedor –terceru autoproducíu–, nun ta tovía a la venta nes tiendes. Los avilesinos van ser la primer banda llocal en tocar nel auditoríu del Centru Niemeyer.