Teberga y Grau van estremase pola llende de 1873

El Conseyu de Gobiernu d'Asturies qu'aconceyó esta mañana baxo la presidencia del xefe del executivu autonómicu Vicente Álvarez Areces, dio-y el preste a una resolución pola qu'acaba una polémica de vieyo ente los conceyos de Grau y Teberga, apautando definitivamente la llende ente dambos conceyos nuna llinia de cerca de siete kilómetros acordies colo que pidiere yá nel añu 2001 el plenu del conceyu de Teberga, que quería una solución a la dulda que llevó a enfrentamientos pol derechu al emplegu de los montes y praos comunales. La disputa por esta llende afectaba a unes 700 hectárees y llevó a episodios como'l que se vivió nel añu 2003, cuando'l conceyu de Teberga amenazó con nun contratar a empreses del conceyu vecín.

Les mediciones que se fexeron agora pa resolver la polémica polos procedimientos tecnolóxicos más modernos y partiendo de les informaciones documentales antigües que se disponíen sobre l'asuntu, que yeren del añu 1873 y del añu 1932, alcontraron a la fin que yeren correchos los datos polos que se mandó facer la separtación ente dambos nada menos que nel añu 1873, y que-y da la razón a Teberga, que d'agora en p'alantre gana 500 hectarees.