Teatru na viéspora d'una selmana de les lletres dedicada a la narrativa

La biblioteca de La Felguera acueye la representación dende les seis de la tarde la obra "De boca a oreya" pola compañía Nun Tris, nun actu que fai de previa a la inauguración oficial de la XXVIII Selmana de les Lletres Asturianes, que va tener llugar na Conseyería de Cultura, entidá organizadora de la mesma, el próximu vienres a les 12. El programa oficial de la Selmana, que pue consultase na so web oficial, perpasa los siete díes de la selmana convencional pa espurrise hasta'l próximu día 22 de mayu, cerca de trés selmanes d’actos cola lliteratura asturiana como protagonista. Como vien siendo vezu dende'l 2005, la Selmana de les Lletres va dedicase a un xéneru lliterariu, en cuenta d’a un autor. Nel 2005 la protagonista foi la poesía, nel 2006 el teatru y nesti 2007 va ser el xéneru narrativu col títulu "Ello yera una vez… un tiempu de narraciones". Amás de los volúmenes conmemorativos de la Selmana "La emancipación de la lliteratura asturiana" del que ye responsable Xosé Lluis Campal y "La narrativa asturiana nel cantu'l mileniu" coordináu por Ismael Arias, que va tener amás una edición en braille, ente los actos previstos rescamplen la esposición "Ello yera una vez… un tiempu de traducciones" en Xixón o la yá tradicional llectura de testos n’asturianu de los diputaos de la Xunta Xeneral, qu'esti añu va facese alredor d'una serie de microrellatos escritos a costafecha pa esta ocasión por distintos escritores del país.