Tapia vivió l’Festival Intercéltico más "impresionante" y multitudinariu

Martín Fernández Cascudo, direutor del Festival Intercéltico d’Occidente (FIDO), amosó la so satisfaición pol desarrollu del certame, esti añu dedicáu a la figura de Kepa Junkera. Foi la edición más multitudinaria de les diecisiete celebraes.

“El balance ye impresionante porque nunca tanta xente se vio nel festival. Amás los grupos se portaron y tamién Kepa Junkera”, comentó Fernández Cascudo, que destacó’l “conciertazu” que dio ayeri’l vascu na playa del Murallón. Pa esta cita, Junkera contó cola collaboración d’un percusionista vascu y músicos asturianos de la banda Llariegu, asina como los gaiteiros Javier Tejedor, José Manuel Fernández ‘Guti’ y el propiu direutor del FIDO. “Toi mui contentu por esta invitación. Ye un placer tocar nesti formato tan íntimu”, señaló’l de Bilbo tres demostrar el so bon facer cola trikitixa –acordión diatónicu vascu–. Amás, Junkera emponderó enriba l’escenariu a la Banda de Gaitas Occidente, organizadora del certame, por “caltener esti festival” qu’espera que “dure munchos años”.

Fernández Cascudo, nel balance que fixo güei d’estos cinco díes de folixa alrodiu la cultura celta, destacó’l bon resultáu final del FIDO pese al presupuestu modestu d’esti añu, nel que l’Intercéltico estrenaba la etiqueta de Fiesta d’Interés Turísticu Autonómicu. Na decimosétima edición participaron les bandes de gaites Marino Tapiega, Villa de Mieres, Vilariño de Conso (Galicia) y Kevrenn Kastell (Breizh). Amás, tamién actuaron El Koku La Manzana, Rubén Alba, los irlandeses Sophie Lavoie & Fiachra O’Regal y los gallegos Kérkennai.

Na semeya, un momentu del conciertu de Kepa Junkera.