“Tapia tien vida tol día mientres l’Intercéltico”, destaca F. Cascudo

|
“Tapia tien vida tol día mientres l’Intercéltico”, destaca F. Cascudo

El Festival Intercéltico d’Occidente (FID’O) encara la so ventena segunda edición. Del miércoles al llunes Tapia va vivir un ambiente festivu “tol día”, como destaca Martín Fernández Cascudo, direutor d’un certame que cuenta con representación "de tol arcu atlánticu".

Formaciones d’Éire, Alba, Breizh, Galicia y Asturies van tocar y baillar nel festival, cola novedá de l’asistencia del Centro Asturiano de Madrid cola so banda El Centru y el grupu de baille L’Alborá, y la vuelta años depués d’una delegación de Bordeu cola que la organizadora Banda Gaitas d’Occidente caltién una perbona rellaición, que va venir cola Aquitaine Highlanders Pipe Band, de perfil escocés. Tamién va haber presencia vasca, cola actuación de Kepa Junkera & Sorginak, prevista pa la primer de les dos noties del Murallón Folk, el vienres.

Asina, la llista d’agrupaciones confirmaes confórmenla’l grupu de danza irlandés Dominic Graham School of Irish Dance, los escoceses Cambridgeshire Caledonian Pipe Band, los bretones Bagad Ker Vourdel y los gallegos Asociación Cultural O Carballo da Manteiga y Pandereteiras de Lalín. La bandina La Talambera (xueves), Ajo Band (viernres nel primer Murallón Folk xunto con Kepa Junkera & Sorginak) y Fontoria y los irlandeses Niamh Ní Charra (sábadu nel segundu Murallón Folk, na que tamién participa la Dominic Graham School of Irish Dance) son los grupos folk que van tocar nel FID’O.

“Yá son 22 festivales, los que nos fai tener un posu d’esperiencia pa escoyer un poco lo meyor de lo que nos ta gustando”, esplica Fernández Cascudo, que destaca l’asistencia de formaciones “de tol arcu atlánticu”. La variedá y el bon ambiente que se conforma na villa estes xornaes, “nos que Tapia tien vida tol día”, ye la gran carta de presentación d’un festival “mui familiar, afayadizu pa venir colos nenos”.

Y ye que los pequeños, cola potente cantera musical de Tapia fortalecida pola esistencia del propiu FID’O, tienen un protagonismu especial. Asina, amás de numberoses actividaes, entamáse’l Festival Infantil de Cultura Celta (vienres a les 20 hores nel puertu), cola participación de la Escuela de Música y Danza del Ayuntamiento de Tapia y la Escuela de Música de Villenave d’Ornon.

Noite Máxica

L’eventu más esperáu del FID’O, sicasí, ye la Noite Máxica que tien llugar el sábadu del certame nel espectacular escenariu de la playa del Murallón. “Nun hai forma de facela descansar por más que nun queremos cayer pesaos col inventu, pero tola xente nos la pide”, apunta Fernández Cascudo.

Nesta ocasión, el Grupo de Teatro Aires Costumbristas, d’A Caridá, va representar ‘Xunta de mitos’, obra de Rafael Cascudo. L’espectáculu va comenzar a les 23.30 hores.

Pa consultar la programación completa del FID’O ha de calcar equí.

Contador Estadistiques