Tapia movilízase contra la Mina de Salave

El proyectu de la empresa Río Narcea Gold Mines p'abrir una mina d'oru a cielu abierto a 100 metros de la costa en Os Llagos de Silva Salave-Tapia) alcuentra una oposición cada vegada más organizada en tolos frentes.

Per una parte, la Coordinadora Ecoloxista d'Asturies presentó ayeri una denuncia énte'l Serviciu de Disciplina Urbanística de la Conseyeria de Mediu Ambiente, Ordenación y Territoriu contra la empresa Explotaciones Mineras del Cantábrico SL filial del grupu Río Narcea Gold Mines portar faciendo prospecciones pa la parte de Os Llagos de Silva, catalogaos como yacimientu arqueolóxicu y que la coordinadora diz que tan llevando alantre esin tener autorización denguna.

La organización ecoloxista argumenta en defensa de la so postura contra los sondeos previos a entamar la mina que la Comisión d'Urbanismu y Ordenación del Territoriu d'Asturies (CUOTA) yá ficiere un informe negativu de la actividad minera en Salave. Nesti informe que tien fecha del 23-9-2004 afítase que l'actividá minera ye un usu prohibíu por ser zona protexida. La Coordinadora diz que, con sabelo, Río Narcea siguió alantre colos trámites contando pa ello cola complicidá de les alministraciones, siempres según la versión de la Coordinadora, que tamién acusa al Conceyu de Tapia de combayar cola empresa por nun mandar aparar estos llabores con tener tamién conocimientu de los mesmos.

La Coordinadora diz que'l valor arqueolóxicu d'Os Llagos de Silva, onde hebo minería d'oru en tiempu de los romanos, y el so valor natural, con especies protexíes animales y vexetales que namás s'alcuentren nesti llugar, ye mui altu, siendo Os Llagos de Silva Llugar d'Interés Comunitariu y Zona Especial de Protección d'Aves (ZEPA). La Coordinadora nun escatima calificativos sobre la gravedá del proyectu en términos mediuambientales, y diz claramente qu'Os Llagos de Silva puen "desapaecer por culpa de los intereses de la multinacional minera".

Los llabores de sondéu que denunció la Ccordinadora énte la Conseyería incluyen movimientos de tierres en zona protexida, desanicie de bardayos en zona onde viven especies protexíes y bombéu d'agua de los llagos.

D'otra manera, los vecinos del llugar, colosque la empresa ta acabante de pidir una reunión pa esplicá-yos el proyectu, tan llevando alantre una gran actividá pa oponese a la mina, canalizada mayormente al traviés de les asociaciones de vecinos "El Pasadoiro" de Mántaras y "Ameicer" de Tapia. Enxertos nuna ferviella de reuniones y recoyíes de firmes, los vecinos tan asoleyando les sos opiniones en páxines web de les qu'ufiertamos un pequeñu estoyu.

Contramina
Asociación de Vecinos Ameicer
Salvemos Salave