“Tamién se pue facer skate n’asturianu”, afirma Mateo Rodríguez

La llista de pallabreros temáticos n’asturianu de la Oficina de Normalización Llingüística de Xixón sigue ampliándose. “Tamién se pue facer skate n’asturianu”, afirma Mateo Rodríguez García, autor del llibrín sobre esti deporte, modalidá que va debutar nunes Olimpiaes en Tokio que cuenta con escena n'Asturies dende los 80.

Acompañáu pol conceyal d’Educación y Cultura, Alberto Ferrao, l’aficionáu que trabaya con una beca nel serviciu de normalización llingüística xixonés presentó nel marcu del Festival Al Resve ‘El Pallabreru del Skate’, que se suma a los anteriores del fútbol, el baloncestu, el ciclismu, la hípica, la natación, los bolos, el surf, el balón volea, el balonmano, l'atletismu, y el monte y la escalada. La pista polideportiva de L’Atalaya, xunto al skatepark de la ciudá, foi’l xueves el llugar escoyíu.

“La nuestra ciudá cuenta con equipamientos, con prauticantes y cuenta con afición; agora tamién cuenta con un pallabreru que quier poner nuna llingua centenaria les pallabres d’un deporte mozu afitáu en Xixón”, espresó l’edil socialista, que considera’l skatepark “un llugar mui afayadizu pa siguir usando y difundiendo les pallabres de los diferentes deportes na nuestra llingua asturiana. Una llingua que ye cultura, que ye patrimoniu, que ye nuestra”.

Rodríguez García esplicó a los presentes los detalles d’esta práutica deportiva nacida nos años 50 en California y que yá contaba con una escena importante n’Asturies na década de los 80, asina como la estructura del llibru: historia, partes del skate, encamientos y beneficios, presencia nos Xuegos Olímpicos de Tokio aplazaos al 2021, modalidaes y, pa finar, la terminoloxía venceyada al patinete. “Tamién se pue facer skate n’asturianu y con esti llibrín buscamos normalizar el skate; que como asocede cola llingua, anque nun la prautiques o la fales, puedas tener conocencia d’esti deporte”, esplica l’autor.

‘El Pallabreru del Skate’ ta editáu de manera física, anque tamién se pue descargar de manera dixital calcando nesti enllaz.

Na semeya, Ferrao y Rodríguez García nel skatepark de Cimavilla.