Sustituyíos el 75% de los teléfonos celulares

A ocho meses pa que remate'l plazu llegal que tien la empresa Telefónica pa retirar los teléfonos celulares (TRAC) de pueblos y zones rurales onde nun llega'l cable telefónicu y sustituyilos por otra tecnoloxía que permita l'accesu a la rede de redes, nel Estáu Español queden entovía 56.354 llínies TRAC, cerca del 24% del total, según se supo gracies a una entruga en parllamentu del diputáu del PP Elías Arribas.

La criticada Llei de Servicios de la Sociedá de la Información y de Comerciu Electrónicu (LSSI) comprometía a Telefónica d'España a presentar primero del 13 d'avientu del 2002 un proyectu de sustitución de les llinies TRAC en cuantes que la posibilidá de conectase a internet convertíase per aciu de la llei en serviciu universal. El plan de Telefónica ponía n'avientu de 2.004 la fecha tope pa camudar tolos teléfonos celulares por otros sistemes que sí permitieren l'accesu a la rede. Pa ello igüóse un plan con un presupuestu de 475 millones d'euros, de los que 145 procedíen de fondos comunitarios FEDER.

Anque la mayoría de la tecnoloxía implantao pa desaniciar los TRAC consiste en llevar el cable tradicional de cobre hasta la casa del abonáu, en munchos llugares ello nun ye rentable, polo que s'adapten soluciones telefonía móvil GSM y GPRS o faense conexones por telefonía fixo inalámbrico LMDS y vía satélite.

Nel casu asturianu, el númberu de llinies TRAC yera n'orixe de más de 40.000, siendo Asturies, tres de Galicia, la comunidá onde más llinies celulares había en tol estáu. Los TRAC valieron pa muncho de la que se punxeron a primeros de los 90, pero anguaño tan desfasaos, col puntu feble de que nun apurren anchu de banda como pa conectase a internet . Neto que nel restu de comunidaes, los TRAC asturianos van desapaeciendo adulces de les caseríes, pero entovía queden munchos por retirar.

Con too y con ello, la tecnoloxía va más rápido que la mesma llei y que Telefónica. Según comenta Víctor Guillermo García, inxenieru de Telecomunicaciones y profesor na Facultá d'Inxeniería de Xixón, anque bien de xente nos pueblos cuenta con sustituyir el TRAC por otra solución más avanzada, ello va vali-yos solo pa conectase a internet, en cuantes que pa falar por teléfonu l'aumentu de les redes de cobertura de la telefonía móvil ta faciendo que'l móvil seya'l preseú de comunicación que más s'emplega nos pueblos en cuenta del teléfonu fixu