Suspensu nel títulu de ‘Especialista Universitario en Asturias’ por presentar un trabayu n’asturianu

La Universidá d’Uviéu punxo esti cursu per primer vegada’l títulu propiu de ‘Especialista Universitario en Asturias. Espacio, Historia, Patrimonio, Cultura’, con 14 matriculaos. A lo menos 3 d’ellos vieron como recibieron un suspensu por presentar n’asturianu un trabayu.

Iniciativa pol Asturianu fai pública esta situación una vegada fináu’l cursu. Según esplica nun comunicáu, “a lo llargo del cursu, dellos alumnos presentaron diferentes trabayos, xeres y actividaes n’asturianu ensin problema, faciendo un usu normal del idioma”, pero nes evaluaciones finales “la calificación d’un trabayu apaecía como ‘non presentáu’ y polo tanto, l’asignatura con un suspensu pa lo menos trés alumnos que dieron anuncia d’esta discriminación”.

Al entrugar pol motivu, yá que los trabayos sí se presentaren, la respuesta foi que taben escritos en llingua asturiana. Y la condición pa evalualos, tornalos al castellanu.

“Dempués de reclamar y nun tener rempuesta del profesor responsable, na segunda convocatoria, el director del títulu propiu asumió la corrección de la xera, lo que-y queremos reconocer dende Iniciativa pol Asturianu, por buscar una solución como compromisu personal del docente. Sicasí, esti voluntarismu nun pue ser la solución definitiva pa garantizar los drechos llingüísticos del alumnáu”, entiende esta organización, que fai un llamáu a la Universidá d’Uviéu “pa iguar de manera definitiva estes situaciones, ensin qu’en nengún casu pase’l pesu de cualquier carga estra sobre l’alumnáu que decide espresase n’asturianu”.

“L’asturianu ye una llingua completamente intelixible y, por tanto, ye absurdo dicir que nun s’entiende l’idioma pa correxir un documentu, más cuando falamos de persones d’amplia formación académica como ye’l casu de profesoráu universitariu”, rescampla Iniciativa pol Asturianu. Por último, recuerda que “la oficialidá ye la ferramienta constitucional qu’aporta igualdá pa les persones independientemente de la llingua que falen. Naide tien que ser discrimináu pola llingua que fale, seya castellán o asturianu”.

Na semeya, patiu del Edificiu Históricu de la Universidá d'Uviéu.