Susana Hevia, direutora nueva del Muséu Etnográficu de Grandas

Susana Hevia va ser la direutora nueva del Muséu Etnográficu de Grandas en sustitución de Francisco Cuesta, destituíu por Cultura en setiembre. L'arqueóloga foi escoyida pola Xunta del Consorciu que xestiona'l centru ente 15 candidatos.
 
La Comisión d'Espertos encamentóla por unanimidá, según comunicó'l conseyeru de Cultura y Deporte, y presidente del Consorciu, Emilio Marcos Vallaure, al términu del aconceyamientu. Los sos ocho miembros dieron el so vistu bonu al nomamientu nun siendo ún, l'alcalde de Grandas de Salime, Eustaquio Revilla, quien yá se posicionara en contra del cese del anterior director, Francisco Cuesta.
 
Los motivos argumentaos pola comisión d'espertos, según esplicó la conseyería al traviés d'una nota de prensa, foron los siguientes: plan d'actuación escelentemente bien plantegáu, defendíu de forma bien coherente, con prioridaes establecíes de manera bien eficaz y que cumple con tolos requisitos esixíos nes bases de la convocatoria. La comisión tuvo integrada por Adolfo García Martínez, profesor-tutor d'Antropoloxía Social y Cultural de la UNED; Alfonso Fernández García, direutor del Muséu del Pueblu d'Asturies; Xosé Carlos Sierra, direutor del Muséu Etnolóxico de Ribadavia (Lugo); José Luis Mingote Calderón, conservador de la coleición d'Europa del Muséu Nacional d'Antropoloxía, y José Ramón Ortiz del Cueto, direutor del Muséu Etnográficu Provincial de Lleón.
 
Hevia va asoceder asina a Francisco Cuesta, que sustituyera yá a José Naveiras, Pepe 'El Ferreiro', cesáu pol anterior Executivu. Esti últimu recurriera'l so despidu y una sentencia xudicial, el mes de setiembre pasáu, dio-y la razón, declarándolu nulu. Otra manera, Vallaure espresó la so satisfaición por solucionar "un problema grave" y adelantó tamién qu'esta fórmula de nomamientu, na qu'una comisión d'espertos encamienta un candidatu a los xestores del centru, va aplicase tamién n'otros equipamientos museísticos, como'l Belles Artes o'l Muséu Arqueolóxicu d'Asturies.