Suena’l Camín llega a la programación d’Asturies.com TV

El documental "Suena'l Camín" fechu por estudiantes de bachilleratu de La Pola L.lena y que retrata la difícil situación de los músicos asturianos yá ta disponible íntegramente al traviés d'Asturies.com TV . Ganador del concursu "nun nos cuentes películes, failes" que convoca'l Festival Internacional de Cine de Xixón, "Suena'l Camín" cuenta les primeres dificultaes qu'alcuentren los grupos y artistes musicales asturianos pa dar a conocer la so obra y la falta d'apoyu de los medios y instituciones al so llabor. Fechu por un grupu d'alumnos de bachilleratu de l'IES de La Pola L.lena, en "Suena'l Camín" "apaecen los verdaderos ganadores, los que faen el camín de la música asturiana día a día, ensin descansu, trabayando ensin recibir otra cosa que la satisfacción de tar lluchando por unos ideales, por una cultura amenazada y que ye la suya". Xune Elipe, del grupu Dixebra, Anabel Santiago, Alberto Toyos, coordinador de 40 Principales Asturies, "Lafu" monitor del taller de rock de Campumanes, y los grupos La Col.lá Propinde, Dark la eMe y Adición Etílika pasen per esti documental que contrapón les opiniones d'artistes yá con una carrera tres d'ellos coles de los que tan entamando.

Tres de la creación d'esta cinta, la productora "L.luna L.lena" formada por Efrén Álvarez Acebal, Fernando Farpón Alvarez, Jorge Pérez Vázquez, Laura Pola Blanco y María del Carmen Bernardo Rubio, toos ellos alumnos del IES Benedicto Nieto de La Pola L.lena. Los realizadores del documental anuncien que van xiralu per dellos lugares n'Asturie en pases especiales, anque entovía tan por facer el calendariu de feches.